اۋە بيلەتتەرى ارزانداي ما؟

باعاعا ىقپال ەتەتىن كريتەريلەر

اۋە بيلەتتەرىنىڭ قىمباتتىعىنا شاعىمداناتىن جولاۋشى كوپ. بۇل ماسەلە ماجىلىستەگى ۇكىمەت ساعاتتارىندا دا بىرنەشە رەت تالقىلانىپ، دەپۋتاتتار اۋە تاسىمالىنىڭ قۇنى نەگىزسىز كوتەرىلىپ جاتقانىن ايتقان ەدى.

وسى ماسەلەگە قاتىستى كولىك مينيسترلىگىنىڭ باسپا ءسوز قىزمەتى رەسمي پىكىر ءبىلدىردى. مالىمدەۋىنشە، اۋە بيلەتىنىڭ باعاسىن مينيسترلىك رەتتەمەيدى. دەسە دە، بيلەت قۇنى قانداي كريتەرييلەرگە بايلانىستى ەسەپتەلەتىنىن ءتۇسىندىردى.

- بيلەت باعاسىنىڭ %36,5 ى اۆياتسيالىق وتىنعا، %15 ى تەحنيكالىق قىزمەتتەرگە جاراتىلادى. اۋە كەمەلەرىنىڭ ليزينگىنە %8,6 ى كەتەدى. ال تابىستىڭ وزگە بولىگى اۋەجاي قىزمەتتەرى، جولاۋشىلارعا كورسەتىلەتىن قىزمەت، جۇمىسشىلاردىڭ جالاقىسى، اەروناۆيگاتسيا، امورتيزاتسيا جانە باسقا دا شىعىندارعا جۇمسالادى، - دەيدى ۆەدومستۆودان.

مەملەكەت باسشىسى ۇكىمەتتىڭ كەڭەيتىلگەن وتىرىسىندا قازاقستاندى حالىقارالىق اۆياتسيالىق حابقا اينالدىرۋ ءۇشىن اۋە وتىنىنىڭ باعاسىن تومەندەتۋ قاجەت ەكەنىن ايتقان ەدى. اسىرەسە، استانا اۋەجايىنداعى جانارماي قۇنى تىم جوعارى دەگەن بولاتىن. وسىعان بايلانىستى باسەكەلەستىكتى قورعاۋ جانە دامىتۋ اگەنتتىگىنە ۇكىمەتپەن بىرلەسە وتىرىپ، ماسەلەنى ءبىرىنشى جارتىجىلدىقتا شەشۋ تاپسىرىلدى.

الايدا بيلەت قۇنى تەك جانارماي مەن قىزمەتتەرگە بايلانىستى بەكىتىلمەيدى. باعانى نارىق رەتتەيدى. بۇل تۋرالى «Air Astana» توبىنىڭ باسشىسى پيتەر فوستەر ايتقان بولاتىن.

- بيلەتتى ەرتەرەك الساڭ، سوعان وراي ارزان بولادى. بيلەت باعاسى سۇرانىسقا دا اسا بايلانىستى. سول سەبەپتى، دەمالىس جانە مەرەكە كۇندەرى باعا جوعارى بولادى. بۇل سالاداعى ديناميكالىق باعا قالىپتاسۋعا بايلانىستى ءارى الەمدىك تاجىريبە، - دەگەن ەدى پيتەر فوستەر.

اۋە بيلەتتەرى ارزانداي ما؟

سوڭعى ساياسي جاعدايلارعا بايلانىستى كوپتەگەن شەتەلدىك اۋە كومپانيالارى رەسەي اۋماعى ارقىلى ۇشۋدان باس تارتقان. ال بۇل قازاقستاننىڭ اۆياتسيا سالاسىنداعى حالىقارالىق ءرولىن كۇشەيتۋگە مۇمكىندىك بەرەدى. الايدا Public Policy Research Center ديرەكتورى مەرۋەرت ماحمۇتوۆا بۇل ماسەلەگە ەكونوميكالىق فاكتورلار، اسىرەسە يمپورتقا تاۋەلدىلىك كەدەرگى كەلتىرەتىنىن ايتادى.

- قازىرگى ۋاقىتتا ايماقتاعى اۋە كومپانيالارىنىڭ كوبى رەسەي اۋە كەڭىستىگىن اينالىپ وتەدى. وسى سەبەپتى، قازاقستاننىڭ استانا، الماتى جانە باسقا دا ءىرى قالالارىنداعى اۋەجايلاردى جولاۋشىلاردى تاسىمالداۋ جانە جانارماي قۇيۋ حابىنا اينالدىرۋ مۇمكىندىگى بار. ءبىراق ەلدەگى اۆياوتىننىڭ نەگىزگى بولىگى رەسەيدەن جەتكىزىلەدى. ال سوڭعى ۋاقىتتا رەسەيدىڭ مۇناي وڭدەۋ زاۋىتتارى مەن مۇناي قويمالارىندا بولعان ءورت وقيعالارى سالدارىنان يمپورت كولەمى قىسقارۋى مۇمكىن. سوندىقتان قازاقستاندا اۆياكەروسين باعاسىن تومەندەتۋ ەكىتالاي، - دەدى ساراپشى.

ول بيلەت باعاسىنىڭ وزگەرۋىنە ىقپال ەتەتىن بىرنەشە فاكتوردى اتاپ ءوتتى.

- اۋە بيلەتىنىڭ باعاسىن قالىپتاستىرۋداعى جالپى شىعىن قۇرىلىمىن ەسكەرۋ قاجەت. وعان قىزمەتكەرلەردىڭ جالاقىسى، قوسالقى قىزمەتتەر، سالىقتار دا كىرەدى. قازىر ق ق س مولشەرلەمەسىن ارتتىرۋ ماسەلەسى قاراستىرىلىپ جاتىر، بۇل دا بيلەت باعاسىنىڭ وسۋىنە ىقپال ەتۋى مۇمكىن. ارينە، مەن دە قاراپايىم ازامات رەتىندە اۋە بيلەتتەرىنىڭ ارزانداعانىن قالايمىن. ءبىراق اۆياوتىن باعاسى تۇرعىسىنان الىپ قاراعاندا مۇنداي وزگەرىستى كۇتۋ قيىن، - دەپ تۇيىندەدى ول.

ايتا كەتەيىك، الماتى حالىقارالىق اۋەجايىنىڭ پرەزيدەنتى گوكەر كوسە ۇشاق بيلەتتەرىنىڭ قىمباتتاۋىنا بايلانىستى پىكىر بىلدىرگەن ەدى.

اۆتور

ارۋجان ماحمۋت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى