وڭتۇستىك كورەيادا سۋ استىندا قالعان تۋننەلدەن 9 ادامنىڭ دەنەسى تابىلدى
بىرنەشە كۇن تولاسسىز جاۋعان جاڭبىردان كەيىنگى تاسقىن سۋدىڭ جەراستى وتكەلىنە تەز قۇيىلعانى سونشا، جولاۋشىلار مەن جۇرگىزۋشىلەر قاشىپ شىعا الماي، كولىگىندە قالىپ قويعان.
ەلدە سۋ تاسقىنى، كوشكىن جانە ەلەكتر قۋاتىنىڭ ۇزىلۋىنەن كەم دەگەندە 37 ادام قازا تاپقان.
توعىز ادام ءىز-ءتۇزسىز كەتتى.
وسونگ قالاسىنداعى ۇزىندىعى 685 مەتر تۋننەلدە قانشا ادام قامالىپ قالعانى بەلگىسىز، ءبىراق 15 كولىك سۋ استىندا قالدى دەپ بولجانىپ وتىر.
بىرنەشە ادامنىڭ ءمايىتى اۆتوبۋس ىشىنەن شىعارىلدى. سەنبى كۇنى امان قالعان توعىز ادام قۇتقارىلدى.
زارداپ شەككەندەردىڭ وتباسى جەرگىلىكتى بيلىك شۇعىل ءارى تەز ارەكەت ەتكەندە ءولىمنىڭ الدىن الۋعا بولاتىن ەدى دەيدى.
جەرگىلىكتى ب ا ق-تىڭ جازۋىنشا، قايعىلى وقيعادان بىرنەشە ساعات بۇرىن تاسقىنعا قارسى كۇرەس باسقارماسى سۋ دەڭگەيىنىڭ مەجەدەن اسىپ كەتكەنىن ەسكەرتكەن، سوندىقتان تۋننەل ماڭىنداعى كولىك قوزعالىسىنىڭ باعىتىن وزگەرتۋ كەرەك ەدى.
قالعان ءولىم-ءجىتىم بۇكىل ۇيلەردى كوشكىن الىپ كەتكەن تاۋلى سولتۇستىك كيەنسان ايماعىندا بولدى.
سەنبى كۇنى وڭتۇستىك كورەيادا شامامەن 300 م م جاۋىن جاۋدى.
كورەي مەتەورولوگيا قاۋىمداستىعىنىڭ مالىمەتىنشە، ادەتتە جىلىنا 1000-1800 م م جاڭبىر جاۋادى، ونىڭ كوپ بولىگى جاز ايلارىنا تۇسپا-تۇس كەلەدى.
سۋ تاسقىنىنان زارداپ شەككەن اۋدانداردان تۇسىرىلگەن اەروفوتوسۋرەتتەردەن قوڭىر لاي مەن تاسقىن سۋدىڭ مول بولعانىن كورۋگە بولادى، سۋدان ۇيلەردىڭ شاتىرى عانا شىعىپ تۇر.
جەرگىلىكتى اكىمشىلىكتەر كەش قابىلداعان ەۆاكۋاتسيا تۋرالى بۇيرىقتان مىڭداعان ادام زارداپ شەكتى.
پرەمەر-مينيستر حان داك سۋ اسكەريلەردەن قۇتقارۋ جۇمىسىنا كومەكتەسۋدى سۇرادى.
اگەنتتىكتىڭ حابارلاۋىنشا، سەنبى كۇنى تاڭەرتەڭ سولتۇستىك چۋنحونداعى گوسان بوگەتى تولا باستاعاندا شامامەن 6400 تۇرعىن ەۆاكۋاتسيالانعان.
بوگەتكە جاقىن ورنالاسقان ءبىرقاتار اۋىلدار مەن ولاردى بايلانىستىراتىن جولدار سۋ استىندا قالىپ، كەي تۇرعىندار ۇيىندە قالىپ قويدى.
جۇما كۇنى كەشكە قاراي كوشكىننىڭ سالدارىنان سولتۇستىك چۋنچحوندا پويىز رەلستەن شىعىپ كەتتى.
ءبىر ينجەنەر زارداپ شەكتى، دەگەنمەن پويىزدا بۇل ۋاقىتتا جولاۋشىلار جوق ەدى.
