تۇركىستان وبلىسىنىڭ 9 تۇرعىنىنان كونگو- قىرىم قاندى بەزگەگى تابىلدى
بۇل تۋرالى تۇركىستان وبلىسى سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى باحتىوراز ەلەمەسوۆ مالىمدەدى، دەپ حابارلايدى قازاقپارات ءتىلشىسى.
جىل باسىنان بەرى تۇركىستان وبلىسىندا كەنە شاققان 985 ادام مەديتسينالىق ۇيىمعا جۇگىنگەن.
ال، 48 ناۋقاس كۇدىك تۋدىرىپ، 9 ناۋقاستىڭ دياگنوزى راستالعان.
ونىڭ ىشىندە ساۋران اۋدانىندا - 2 جاعداي، ورداباسى، وتىرار، تولەبي، كەلەس، ماقتاارال، جەتىساي اۋداندارى مەن تۇركىستان قالاسىندا 1 جاعداي تىركەلگەن.
«اسا قاۋىپتى جۇقپالى كونگو- قىرىم گەمورراگيالىق قىزباسى ينفەكسياسى ادام اعزاسىنا كەنەنىڭ شاعۋى ارقىلى ەنەدى. سونداي- اق، جانۋارلاردى كۇتىپ باققان كەزدە، ءتورت تۇلىك مالدىڭ جانە ناۋقاس ادامنىڭ قانىمەن جۇعۋى مۇمكىن. بۇل اۋرۋعا كوبىنە مالشىلار، شوپاندار جانە مال كۇتىمىمەن اينالىساتىن، مال ونىمدەرىن وندىرەتىن ادامدار شالدىعادى»، - دەدى باحتىوراز ەلەمەسوۆ.
كەنە شاققان جاعدايدا نە ىستەۋ قاجەت؟
- كەنەنى جالاڭاش قولمەن ۇستاماۋ كەرەك، ويتكەنى جۇقپالى اۋرۋ اگەنتى شىرىشتى قابىقتار نەمەسە تەرىدەگى زاقىمدانعان جەرلەر ارقىلى ەنۋى مۇمكىن.
- دەنەدەگى كەنەنى الۋ ءۇشىن ۇشى وتكىر پينتسەت قولدانۋ ۇسىنىلادى. پينتسەتتى تەرىگە جاقىنداتا وتىرىپ، ونىمەن كەنەنى ءىلىپ الۋ قاجەت. پينتسەتتى قاتتى قىسپاي (كەنەنى مىجىپ تاستاماۋ ءۇشىن) شايقالتپاي، اقىرىن تارتۋ كەرەك، سەبەبى كەنەنىڭ اۋىز بولىگىنىڭ ءبولىنىپ تەرىدە قالىپ قويۋىنا اكەلۋى مۇمكىن.
- كەنە دەنەگە بىردەن قادالمايدى، سوندىقتان ونى ۋاقىتىلى الىپ تاستاۋ ارقىلى اۋرۋ جۇقتىرۋدىڭ الدىن الۋعا بولادى. دەنەگە كەنەنىڭ جابىسقان جابىسپاعانىن ءبىلۋ ءۇشىن ءار ادام ءوزىن ءوزى تەكسەرىپ نەمەسە ءبىرىن- ءبىرى قاراپ شىققانى ماڭىزدى.
- كەنەنى تارتىپ العاننان كەيىن شاققان جەردى دەزينفەكتسيالايتىن زاتپەن سپيرتپەن، يودپەن وڭدەپ، قولدى سابىنمەن جۋۋ كەرەك.
- كەنەنى مىجعىلاماۋ كەرەك، سەبەبى كەنەنىڭ ىشىندە جانە سۇيىقتىعىندا پاتوگەندەر بولۋى مۇمكىن.
- الىنعان كەنەنى ىدىسقا سالىپ، قاقپاقپەن تىعىزداپ جابۋ قاجەت.
- كەنەگە كەروسين ماي، اتسەتون ت. ب سۇيىقتىق قۇيۋعا، ونى تەرىدەن ءبولۋ ءۇشىن كەنەنى ىسىتۋعا بولمايدى.
- ءسىزدىڭ مىندەتىڭىز كەنەنى مۇمكىندىگىنشە الىپ تاستاپ، ۋاقىت جوعالتپاي مەديتسينالىق كومەككە جۇگىنۋ.
- تابيعاتقا دەمالىسقا شىققاندا كەنەنىڭ جابىسقانى كورىنەتىن اشىق ءتۇستى جاقسى قورعالعان رەزەڭكەلى مانجەتتى جەڭى ۇزىن كويلەك كيۋ قاجەت.
- دەنەنىڭ اشىق جەرلەرىنە جانە كيىمگە كەنە اعزاسىنا كەرى اسەر ەتەتىن نەمەسە ونى جويۋعا ارنالعان ارنايى اكارورەپەلەنتتەردى، اكاريتسيدتەردى جانە جەكە قورعانۋ قۇرالدارىن قولدانۋ قاجەت.
- مال قورانى دەزينفەكتسيالاپ، ۇنەمى تازالاپ وتىرىڭىز.
