ەلوردادا 9 مەكتەپ پايدالانۋعا بەرىلەدى - فوتو
«بيىلعى وقۋ جىلىندا تاعى 9 مەكتەپتى قولدانىسقا بەرەمىز. ماسەلەن بۇل رىسقۇلوۆ كوشەسىندەگى، ر. قوشقاربايەۆ داڭعىلىنداعى، ۇلى دالا داڭعىلى مەن ساۋران كوشەسىنىڭ قيىلىسىنداعى، ۇلى دالا داڭعىلى مەن №39-كوشەنىڭ قيىلىسىنداعى جانە ت. ب. مەكتەپتەر. كوكتەمدە ىرگەلەس اۋماقتى اباتتاندىرۋعا كىرىسۋدى تاپسىردىم. الداعى وقۋ جىلىندا تاعى 13 مەكتەپ سالامىز. قالادا ءىرى مەكتەپتەر سالىنىپ جاتىر. مۇنداي مەكتەپتىڭ ءارقايسىسى 4 مىڭ وقۋشى ورنىن (2 اۋىسىمدا) اشۋعا مۇمكىندىك بەرەدى. وسىلايشا وقۋشى ورىندارىنا دەگەن قاجەتتىلىك ماسەلەسى ەداۋىر شەشىلەدى»، - دەپ جازدى قالا اكىمى جەلىدەگى پاراقشاسىندا.
اكىمنىڭ سوزىنە قاراعاندا مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 100 مىڭ وقۋشى ورنىنا (2 اۋىسىمدا) ارنالعان جاڭا فورماتتاعى 25 مەكتەپتى جوبالاۋ جۇمىسى جۇرگىزىلۋدە. جاڭا فورماتتاعى مەكتەپتەردىڭ قۇرىلىسىن 2023 -جىلى باستالماق.
«بالاباقشا ماسەلەسىنە دە كوڭىل بولەمىز: جاقىندا ەسىل اۋدانىندا (كۇلتەگىن كوشەسى) مەملەكەتتىك بالاباقشا اشىلدى. سول سياقتى كەلەر جىلى جەكە بالاباقشالارعا 9 مىڭ ورىنعا ارنالعان قوسىمشا مەملەكەتتىك تاپسىرىس ورنالاستىرۋدى جوسپارلاپ وتىرمىز، وسى ارقىلى بالالاردى مەكتەپكە دەيىنگى بىلىممەن قامتۋ كولەمىن ارتتىرامىز»، - دەدى اكىم.
