قاراعاندىدا ەر ادام 9 كولىكتىڭ تەرەزەسىن سىندىرىپ، كەيىن اناسىن ولتىرگەن
3-ماۋسىم كۇنى ساعات 00.35 تە «102» پۋلتىنە قاراعاندى قالاسى گاپەيەۆ كوشەسىندەگى № 29 ءۇيدىڭ الدىندا ەر ادام اۋلادا تۇرعان توعىز اۆتوموبيلدىڭ اينەگىن سىندىرعانى تۋرالى حابارلاما تۇسكەن.
«اتالعان فاكتى بويىنشا ق ر قىلمىستىق كودەكسىنىڭ 293-بابى 1-بولىگى (بۇزاقىلىق) بويىنشا سوتقا دەيىنگى تەرگەۋ باستالدى. قاراعاندى قالالىق پوليتسيا پولكىنىڭ ناريادى وسى ءۇيدىڭ 34 جاستاعى تۇرعىنىن «ءىزىن سۋىتپاي» ۇستادى. ول بۇرىن سوتتى بولماعان. كۇدىكتى پوليتسيانىڭ وڭتۇستىك- شىعىس بولىمىنە جەتكىزىلدى. ناركولوگيالىق ديسپانسەردە جۇرگىزىلگەن مەديتسينالىق كۋالاندىرۋ بويىنشا ۇستالعان ازاماتتىڭ دەنساۋلىق ساقتاۋ ورگاندارىندا ناركولوگيالىق جانە پسيحياتريالىق ەسەپتە تۇرمايتىنى انىقتالدى»، - دەپ حابارلادى قاراعاندى وبلىسى پوليسيا دەپارتامەنتى باستىعىنىڭ تەرگەۋ جۇمىسى جونىندەگى ورىنباسارى ەرنات قالياقپاروۆ.
ءتارتىپ ساقشىلارى كۇدىكتىنىڭ جەكە باسىن جانە ول جاساعان اسا اۋىر ەمەس قىلمىستى ەسكەرە وتىرىپ، تەرگەۋ ارەكەتتەرىن جۇرگىزگەننەن كەيىن ەكى ساعاتتان سوڭ ەر ادامدى ۇيىنە جىبەرگەن. الايدا، سول كۇنى ساعات 07.55 تە جوعارىدا اتالعان مەكەنجايداعى پاتەرلەردىڭ بىرىنەن ايەلدىڭ ءمايىتى تابىلعانى تۋرالى حابارلاما تۇسكەن. ايەل سول كۇنى تۇندە كولىكتەردىڭ تەرەزەسىن سىندىرعان ەر ادامنىڭ 70 جاستاعى اناسى ەكەنى انىقتالدى.
«جەدەل- ىزدەستىرۋ شارالارى بارىسىندا كريمينالدىق پوليسيا قىزمەتكەرلەرى قالا كوشەلەرىنىڭ بىرىنەن كۇدىكتىنى ۇستادى. ول كورشىلەرىنە كەلتىرىلگەن زالالدى وتەۋ بويىنشا اناسىمەن تۋىنداعان جانجال بارىسىندا وعان پىشاق جاراقاتىن سالعانىن ايتتى»، - دەپ ءمالىم ەتتى ەرنات قالياقپاروۆ.
اتالعان فاكتى بويىنشا ق ر ق ك- نىڭ 99-بابى (كىسى ءولتىرۋ) بويىنشا قىلمىستىق ءىس تىركەلدى.
