قازاقستاندا الداعى ءۇش جىلدا 9 سۋ قويماسى سالىنادى

بۇل تۋرالى ق ر ەكولوگيا، گەولوگيا جانە تابيعي رەسۋرستار ۆيتسە- ءمينيسترى سەرىك قوجانيازوۆ ءمالىم ەتتى، دەپ حابارلايدى قازاقپارات ءتىلشىسى.

«ەلىمىزدەگى 8 سۋ شارۋاشىلىعى باسسەينىنىڭ 7 - ترانسشەكارالىق. سۋ جەتكىزۋدە كليماتتىق فاكتورلاردان بولەك، تراناسشەكارالىق ەلدەردىڭ سۋ شارۋاشىلىعى تاجىريبەسى اسەرىن تيگىزەدى. مۇنداي جاعدايدا سۋ ەكوجۇيەلەرىنىڭ قاجەتتىلىگى قالدىق پرينتسيپى بويىنشا قاناعاتتاندىرىلادى. ارال مەن بالقاشقا قاتىستى پروبلەمانىڭ باستى سەبەبى وسىندا. ەلىمىزدە سۋدى پايدالانۋ تيىمدىلىگى تومەن. ايتالىق، ءبىر ونىمگە رەسەي مەن ا ق ش- قا قاراعاندا 3 ەسە، ال اۆسترالياعا قاراعاندا 6 ەسە كوپ سۋ جۇمسالادى»، - دەدى سەرىك قوجانيازوۆ ەلوردادا ءوتىپ جاتقان «ECOJER» حالىقارالىق ەكولوگيالىق كونگرەسى بارىسىندا.

سونداي- اق ۆيتسە- مينيستر سۋ شارۋاشىلىعىنا قاتىستى ماسەلەلەر «جاسىل قازاقستان»، «قۋاتتى وڭىرلەر - ەل دامۋىنىڭ درايۆەرى» ۇلتتىق جوبالارى جانە 2025 -جىلعا دەيىنگى اگروونەركاسىپتىك كەشەن اياسىندا شەشىلەتىنىن اتاپ ءوتتى.

«قوسىمشا سۋ كولەمىن قامتاماسىز ەتۋ ءۇشىن 2025 -جىلعا دەيىن سۋ قورى 1,7 تەكشە شاقىرىمدى قۇرايتىن 9 جاڭا سۋ قويماسى سالىنادى»، - دەپ تولىقتىردى سپيكەر.

ودان بولەك، ءمينيستردىڭ ورىنباسارى پرەزيدەنتتىڭ تاپسىرماسىنا سايكەس جاڭا سۋ كودەكسىن ازىرلەۋ بويىنشا جۇمىستاردىڭ ءجۇرىپ جاتقانىن حابارلادى.

ونىڭ ايتۋىنشا، جاڭا سۋ كودەكسى ەلىمىزدەگى سۋ رەسۋرستارىن ساقتاۋعا جانە ونى ۇنەمدى پايدالانۋعا مۇمكىندىك بەرەدى. بۇعان دەيىن ۆيتسە- مينيستر 2030 -جىلعا قاراي قازاقستاندا سۋ رەسۋرستارىنىڭ تاپشىلىعى بولۋى مۇمكىندىگىن ءمالىم ەتكەن ەدى.

اۆتور: ءالي يبرايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى