اتىراۋ وبلىسىنداعى 9 ادام قازا تاپقان جول اپاتى: جاڭا مالىمەتتەر ايتىلدى

4 - قازان كۇنى اتىراۋ وبلىسىنداعى اتىراۋ- اقتوبە تاسجولىندا ەكى كولىك سوقتىعىسىپ، سالدارىنان ەكى كولىكتىڭ جۇرگىزۋشىسى، جولاۋشىلارى - بارلىعى 9 ادام تۇگەلدەي كوز جۇمعان بولاتىن.

ق ر ىشكى ىستەر ءمينيسترى ەرلان تۇرعىمبايەۆ وقيعا بويىنشا تەرگەۋ باستالعانىن ايتتى. وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، «Renault Duster» كولىگىندە ماقات اۋدانىنىڭ تۇرعىندارى بولعان. كولىكتى 57 جاستاعى جۇرگىزۋشى باسقارعان. سالوندا 55 جاستاعى ايەلى مەن 15 جاستاعى ۇلى، سونداي- اق 36 جاستاعى تۋىسى بولعان. ال، «Geely» كولىگىنىڭ جۇرگىزۋشىسى اتىراۋ قالاسىنا ىرگەلەس ورنالاسقان تومارلى اۋىلىنىڭ 36 جاستاعى تۇرعىنى ەكەنى انىقتالدى. كولىكتە قىزىلقوعا اۋدانىنىڭ جانگەلدين اۋىلىنان 67 جاستاعى ايەل مەن اتىراۋ قالاسىنىڭ ءۇش تۇرعىنى وتىرعان. ولار - 63 جاستاعى ەر ادام مەن 63 جانە 38 جاستاعى ايەلدەر. بارلىعى - تۋىسقاندار.

اتالعان فاكتىگە قاتىستى ق ر قىلمىستىق كودەكسىنىڭ 345-بابىنىڭ 4-بولىگىمەن (ەكى نەمەسە ودان دا كوپ ادامنىڭ ولىمىنە اكەپ سوققان، كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) قىلمىستىق ءىس قوزعالعان.

اۆتور: بەك مۇستافا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى