استانادا اۋدان اكىمىنىڭ بۇرىنعى ورىنباسارى 9 جىلعا سوتتالدى
«اكچۋرين ريزا ءانۋار ۇلىنا مۇلكىن تاركىلەي وتىرىپ، توعىز جىلعا باس بوستاندىعىنان ايىرۋ جازاسى تاعايىندالسىن. قىلمىستىق جولمەن الىنعان Toyota Highlander ماركالى كولىگى تاركىلەنسىن»، - دەلىنگەن 2№ سارىارقا اۋداندىق سوتىنىڭ ۇكىمىندە.
سونداي-اق ول مەملەكەتتىك جانە جەرگىلىكتى اتقارۋشى ورگانداردا لاۋازىمدى قىزمەتتەردى يەلەنۋ قۇقىعىنان ءومىر بويىنا ايىرىلدى. جازانى قىلمىستىق-اتقارۋ جۇيەسىنىڭ قاۋىپسىزدىگى ورتاشا دەڭگەيدەگى مەكەمەسىندە وتەيتىن بولادى.
ءىس ماتەريالدارىنا سايكەس، ريزا اكچۋرين بيۋدجەتتىڭ 122 ميلليون تەڭگەسىن جىمقىرعان.
«اكچۋرين ر. ءا. مەملەكەتتىك فۋنكسيالاردى اتقارۋعا وكىلەتتى لاۋازىمدى تۇلعا بولا تۇرا، 2015-2016-جىلدارى جالپى سوماسى 122127221,4 تەڭگە كولەمىندەگى بيۋدجەت قاراجاتىن جىمقىردى. وسىلايشا، لاۋازىمدى قىزمەتىن پايدالانا وتىرىپ، ادامداردىڭ ءبىر توبىمەن الدىن الا ءسوز بايلاسىپ، سەنىپ تاپسىرىلعان وزگەنىڭ مۇلكىن يەمدەنگەن»، - دەلىنگەن ۇكىمدە.
اتاپ وتىلگەندەي، اسا ءىرى كولەمدەگى مەملەكەت قاراجاتى «س ب س-سناب سەرۆيس» ج ش س جانە «Install Service Com» ج ش س كومپانيالارىن پايدالانا وتىرىپ يەمدەلگەن.
ەسكە سالايىق، ريزا اكچۋرين 2017-جىلدىڭ قاڭتار ايىندا ۇستالعان بولاتىن. وعان استانا قالاسى اكىمدىگىنە قاراستى «استانا تازالىق» ج ش س- نىڭ باس ديرەكتورى ا. باسقانبايەۆپەن قىلمىستىق ىمىراعا كەلە وتىرىپ، «س ب س سناب- سەرۆيس» جانە «Install Service Com» جاۋاپكەرشىلىگى شەكتەۋلى سەرىكتەستەرىن قۇرعان جانە 2016-جىلى 1,8 ميلليارد تەڭگە سوماعا مەملەكەتتىك ساتىپ الۋلار كونكۋرسىن جەڭىپ الۋلارىن زاڭسىز قامتاماسىز ەتتى دەگەن كۇدىك كەلتىرىلگەن بولاتىن.
