كەلەر جىلى زەينەتاقى تولەمدەرى 9 پايىزعا ارتادى

 بۇل تۋرالى بۇگىن ماجىلىستە «2015-2017 - جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.

قارجى ءمينيسترى باقىت سۇلتانوۆتىڭ ايتۋىنشا، 2015-2017 - جىلدار ارالىعىندا الەمەتتىك قورعاۋعا جۇمسالاتىن بيۋدجەت شىعىستارى 5 ترليون 889 ميلليارد تەڭگەنى، ونىڭ ىشىندە 2015 - جىلى - 1 ترليون 713 ميلليارد تەڭگەنى قۇرايدى.

«اتاپ ايتقاندا، 2015 - جىلعى 1- قاڭتاردان باستاپ زەينەتاقىلىق تولەمدەر مولشەرىن 9 پايىزعا، سونداي- اق مەملەكەتتىك الەۋمەتتىك جاردەماقىلاردى 7 پايىزعا ارتتىرۋعا - 129 ميلليارد تەڭگە كوزدەلەدى. بۇدان بولەك، مۇگەدەكتىگى جانە اسىراۋشىسىنان ايىرىلۋ جاعدايى بويىنشا الەۋمەتتىك جاردەماقىلاردىڭ 2015 - جىلعى 1- شىلدەدەن باستاپ 25 پايىز ارتۋىنا - 23 ميلليارد تەڭگە، 2017 - جىلعى 1- شىلدەدەن باستاپ ەڭبەك وتىلىمىنە بايلانىستى بازالىق زەينەتاقى تاعايىنداۋعا -   137,4 ميلليارد تەڭگە قاراستىرىلىپ وتىر» ، - دەيدى قارجى ءمينيسترى.

ونىڭ ايتۋىنشا، 2016 - جىلدان باستاپ كۇش قۇرىلىمدارى سالاسىن زەينەتاقىلىق قامتاماسىز ەتۋدى رەفورمالاۋعا 30 ميلليارد تەڭگە كوزدەلەدى. بۇدان بولەك، حالىقتى تۇراقتى جۇمىسپەن قامتاماسىز ەتۋ، سونداي- اق  اۋىلدا كاسىپكەرلىكتى دامىتۋعا جاردەم كورسەتۋ ماقساتىندا «جۇمىسپەن قامتۋ-2020» جول كارتاسىن ىسكە اسىرۋ جالعاستىرىلاتىن بولادى. وسى ماقساتقا 2015-2017 - جىلدارى 297 ميلليارد تەڭگە باعىتتاۋ قاراستىرىلعان، ونىڭ ىشىندە 2015 - جىلى جۇمسالاتىن شىعىستار 92 ميلليارد تەڭگەنى قۇرايدى.

 اۆتور:   قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى