قازاقستانداعى مەكتەپتەردىڭ 99 پايىزى ينتەرنەتكە قوسىلعان
بۇل تۋرالى ماجىلىستە ءبىلىم سالاسىنداعى سيفرلاندىرۋ تاقىرىبىندا وتكەن ۇكىمەت ساعاتىندا ق ر ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات.
«مەكتەپتەردىڭ ينفراقۇرىلىمىن دامىتىپ جاتىرمىز. قازىر مەكتەپتەردىڭ 99 پايىزى ينتەرنەتكە قوسىلعان، ءبىراق ونىڭ ىشىندە تەك 62 پايىزى جىلدام ينتەرنەتكە قوسىلدى. بۇگىندە 2,5 مىڭ مەكتەپكە نەمەسە 35 پايىزىندا wi-fi تارتىلدى»، - دەپ توقتالدى مينيستر.
بۇدان بولەك ە. ساعادييەۆ 2016- 2017-جىلدارى جىل سايىن 14 مىڭنان استام مۋلتيمەديالىق جيىنتىق ساتىپ الىنعانىن اتاپ ءوتتى. وسى جىلى رەسپۋبليكالىق بيۋدجەتتەن 6 ميلليارد تەڭگە ترانسفەرتتەر ءبولىندى. سونىمەن قاتار ءۇشىنشى جىل قاتارىنان اكىمدىكتەر قوسىمشا 10 مىنان استام جيىنتىعىن الىپ جاتىر. الداعى ماقسات - اۋىلداعى جانە قالاداعى مەكتەپتەردىڭ ۆيدەوقۇرالدارىن 80 پايىزعا جەتكىزۋ.
«ول مۇعالىمنىڭ ورنىن باسا المايدى، ءبىراق بۇل مۇعالىمگە ءارى وقۋشىعا ۇلكەن كومەك. وندا فيزيكا، حيميا، بيولوگيا جانە تاعى دا باسقا پاندەر بويىنشا قازاقستاننىڭ جانە الەمنىڭ ۇزدىك ۆيدەولارى جيناقتالعان»، - دەدى ول.
سونىمەن بىرگە، ەلباسىنىڭ جولداۋىنا سايكەس، بارلىق وڭىردە وقۋشىلار سارايىنىڭ بازاسىندا قاجەتتى ينفراقۇرىلىمى، كومپيۋتەرلىك لابوراتورياسى، 3D- پرينتەر بار بالالار تەحنوپاركتەرى مەن بيزنەس-ينكۋباتورلارىن قۇرۋ جۇمىستارى باستالدى.
«4 مىڭنان استام مەكتەپتە ەلەكتروندىق «كۇندەلىك» ەنگىزىلدى. سونىمەن قاتار، سول سياقتى «Bilimal» جانە «Mektep» كومپانيالارىنىڭ ەلەكتروندىق كۇندەلىكتەرى كوسىمشا 600 مەكتەپتە بار. بۇنىڭ ءبارىن شامامەن ءۇش جارىم ميلليون ادام قولدانادى. ولار: مۇعالىمدەر، وقۋشىلار جانە اتا-انالار. مەن بۇعان دەيىن ايتقانداي، ەڭ الىس اۋىلدارعا ەلەكتروندى كۇندەلىكتى، بارلىق پاندەر بويىنشا ۇزدىك ۆيدەوساباقتاردى قولجەتىمدى ەتۋ مىندەتى تۇر. قازىر بۇل باعىتتا جۇمىس جاساپ جاتىرمىز»، - دەدى ە. ساعاديەۆ.
