استانادا 9900 ورىنعا ارنالعان توعىز مەكتەپتىڭ قۇرىلىسى باستالدى

 جىل سوڭىنا دەيىن ءارقايسىسى 240 ورىنعا ارنالعان ەكى بالاباقشا قولدانىسقا بەرىلەدى. ءبىرى سارايشىق مولتەك اۋدانىندا، ەكىنشىسى ماكارەنكو، راديشيەۆا كوشە قيىلىسىندا ورنالاسقان.

قازىرگى كۇندە مەملەكەتتىك - جەكە ارىپتەستىك اياسىندا 1680 ورىنعا ارنالعان التى بالاباقشانىڭ جوباسى جۇزەگە اسىرىلۋدا، بەرىلۋ مەرزىمى - 2019 -جىل. سونىمەن قاتار، جاڭادان اشىلعان 79 جەكەمەنشىك بالاباقشادا مەملەكەتتىك تاپسىرىستى ورىنداۋ اياسىندا 6359 ورىن اشىلادى.

استانا اكىمدىگى باسشىلىعىنىڭ كوشپەلى كەڭەسى بارىسىندا سارى ارقا اۋدانىندا ورنالاسقان  1200 ورىنعا ارنالعان مەكتەپ قۇرىلىسىنىڭ بارىسى باياندالدى. قۇرىلىس 2018 -جىلدىڭ تامىز ايىندا اياقتالادى. عيمارات كۇمىسبەكوۆ - بيگەلدينوۆ، اباي مەن سارىارقا داڭعىلى ايماعىندا ورنالاسقان.

 جاڭا وقۋ جىلىندا مەكتەپتەردە ورىن تاپشىلىعىن شەشۋ ماقساتىندا  2600 ورىنعا ارنالعان بەس جاپسارلى عيمارات سالىنىپ، قولدانىسقا بەرىلدى. جاڭا كورپۋستار مىنا مەكەن جايلاردا ورنالاسقان: № 37 مەكتەپ - كۇيشى دينا 46/2, № 16 مەكتەپ - كەنەسارى 81, № 17 مەكتەپ- گيمنازيا - قابانباي باتىر 9/1, № 22 مەكتەپ- جيرەنتايەۆ 16, № 32 مەكتەپ - ابىلاي حان 25/3. اسەت يسەكەشيەۆ بارلىق كورپۋستىن دايىندىعىن تەكسەردى.

سونىمەن قاتار، اكىم كۇردەلى جوندەۋ جۇمىستارى وتكىزىلگەن № 29 ورتا مەكتەپتە بولدى. بۇل مەكتەپتە بىلتىر سىمنىڭ قىسقا تۇيىقتالۋىنان ءورت شىعىپ، ءبىلىم وشاعىنا ايتارلىقتاي زاقىم كەلگەن. وسى جازدا جاڭا بلوك تۇرعىزىلىپ، ينجەنەرلىك جەلىلەر وتكىزىلدى، جاڭا تەرەزەلەر مەن ەسىكتەر ورناتىلدى.

قالامىزدىڭ 74 - ورتا ءبىلىم بەرۋ مەكەمەسىندە ەرەكشە قاجەتتىلىكتەرى بار بالالارعا ارنالعان ينكليۋزيۆتى ءبىلىم بەرۋ ۇيىمداستىرىلدى. وقۋ بارىسىنا ءارتۇرلى دياگنوزى بار وقۋشىلار بارادى (قانت ديابەتى، ەپيلەپسيا، تۋا بىتكەن دامۋ اقاۋلارى، تىنىس دەمىكپەسى، لەيكوز جانە ت. ب) .

سونىمەن قاتار، اسەت يسەكەشيەۆ مۇگەدەك بالالارعا ارنالعان كاراتە جانە ءجۇزۋ سەكسيالارىنىڭ جۇمىسىمەن تانىستى. قازىرگى كۇنى باس قالامىزدا مۇمكىندىگى شەكتەۋلى بالالاردىڭ سپورتپەن ەركىن شۇعىلدانۋىنا بار مۇمكىندىك جاسالۋدا.

كوشپەلى كەڭەس بارىسىندا قاراساي باتىر كوشەسىندە ورنالاسقان كوپسالالى كوللەدجدىڭ كۇردەلى جوندەۋ جۇمىستارى تۋرالى باياندالدى. وقۋ ورنىنىڭ ەكى بلوگىندا جوندەۋ اياقتالعان، ءۇشىنشى بلوكتا جوندەۋ جۇمىستارى ءجۇرىپ جاتىر.

وسى جىلى 9900 ورىنعا ارنالعان 9 مەكتەپتىڭ قۇرىلىسى باستالدى:

1. اباي - بيگەلدينوۆ كوشەلەرى قيىلىسىندا ورنالاسقان 1200 ورىندىق مەكتەپ؛

2. وقجەتپەس - بوكەيەۆ كوشەلەرى قيىلىسىندا ورنالاسقان 1200 ورىندىق مەكتەپ؛

3. قورعالجىن تاسجولىندا ورنالاسقان 900 ورىنعا ارنالعان مەكتەپ؛

4. ناجىميدەنوۆ - قالداياقوۆ كوشەلەرىنىڭ قيىلىسىنداعى 1200 ورىنعا ارنالعان مەكتەپ؛

5. وقجەتپەس - قارتالى كوشەلەرىنىڭ قيىلىسىنداعى 1200 ورىندىق مەكتەپ؛

6. سەيفۋللين - وماروۆ كوشە قيىلىسىندا ورنالاسقان 900 ورىنعا ارنالعان مەكتەپ؛

7. ساۋران - № 26 جانە حۋسەين بەن تالال كوشەلەرى قيىلىسىندا ورنالاسقان 1200 ورىندىق مەكتەپ؛

8. № 41 - جۇمابايەۆ كوشەلەرى قيىلىسىندا ورنالاسقان 1200 ورىندىق مەكتەپ؛

9. № 31 - نۇرا ەسىل كوشەلەرى قيىلىسىندا ورنالاسقان 1200 ورىندىق مەكتەپ.

سونىمەن قاتار، يمانوۆ - برۋسيلوۆسكي كوشەلەرى قيىلىسىندا 900 ورىنعا ارنالعان ونىنشى مەكتەپتىڭ قۇرىلىسى جوسپارلانعان. تۇرعىندارى نەعۇرلىم تىعىز ورنالاسقان اۋدانداردا 37 مەكتەپ جانە 10 قوسىمشا قۇرىلىس جۇرگىزۋ ءۇشىن جەر ۋچاسكەلەرىن ءبولۋ بويىنشا سۇراقتار قارالدى.

كوشپەلى كەڭەس بارىسىندا، قالا اكىمى اسەت يسەكەشيەۆ ءبىلىم باسقارماسىنىڭ باسشىسىنا جانە ورىنباسارلارىنا قۇرىلىسى ءجۇرىپ جاتقان ءبىلىم وشاقتارىن قاداعالاۋدا ۇستاۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى