بيىل پاۆلودار وبلىسىنىڭ ەلدى مەكەندەرىنە 98 اكىم سايلانادى

بۇل تۋرالى «2017-جىلعى تامىز ايىنا بەكىتىلگەن اۋىلدىق وكرۋگتىڭ قۇرامىنا كىرمەيتىن اۋىلدىق وكرۋگتەر مەن اۋىلداردىڭ اكىمدەرىن سايلاۋ» تۋرالى وتكەن باسپا ءسوز جيىنىندا پاۆلودار وبلىستىق سايلاۋ كوميسسياسى ءتوراعاسىنىڭ ورىنباسارى ۆەرا ەراشوۆا ءمالىم ەتتى، دەپ حابارلايدى pavlodarnews.kz.

«سايلاۋ پاۆلودار وبلىسىنىڭ 98 اۋىلىندا جانە وكرۋگتەرىندە 2017-جىلعى 16- جانە 17- تامىزدا وتكىزىلەدى»، - دەيدى ۆەرا ەراشوۆا.

پاۆسايلاۋ كوميسسياسى ءتوراعاسى ورىنباسارىنىڭ ايتۋىنشا، اۋماقتىق سايلاۋ كوميسسيالارىنىڭ كۇنتىزبەلىك جوسپارلارىنا سايكەس، اكىمدىككە كانديداتتاردى ۇسىنۋ 22- جانە 23-شىلدەدە اياقتالىپ، بارلىعى 297 كانديدات ۇسىنىلدى.

ولاردىڭ قويىلعان بارلىق تالاپتارعا سايكەستىگى ناقتىلانعاننان كەيىن، اۋماقتىق سايلاۋ كوميسسيالارى 294 كانديداتتى تىركەدى. سەبەبى، ءۇش كانديدات بەرگەن وتىنىشتەرىن قايتارىپ العان. جالپى، 110 عا جۋىق سايلانۋشى - ايەل ادامدار. ءبىر بوس ورىنعا ەڭ كەمى ەكى ۇمىتكەردەن بولۋ كەرەك. ءار اۋدان مەن قالادا سايلاناتىن اۋىلدىق اكىمدەر سانى ءارتۇرلى.

ماسەلەن، پاۆلودار قالاسىنا قاراستى ەكى اۋىلدا عانا اكىم سايلانسا، كاچير اۋدانىنداعى اۋىلداردا - 11 جاڭا باسشى. قازىرگى كەزدە سالىق ورگاندارى كانديداتتاردىڭ جانە ولاردىڭ جۇبايلارىنىڭ كىرىس تۋرالى مالىمەتتەرىنىڭ دۇرىستىعىن انىقتاۋدا.

ۇگىت جۇمىستارى 2- جانە 3- تامىزدا باستالىپ، سايلاۋ الدىنداعى كۇننىڭ 00:00 ساعاتىندا (14- جانە 15- تامىزدا) اياقتالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى