نۇر- سۇلتان دارىگەرلەرى 960 گرامم سالماقپەن دۇنيەگە كەلگەن سابيگە كۇتىم جاساپ جاتىر
بۇل وقيعا انار ءاشىموۆانىڭ وتباسىندا بولىپ وتىر، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
ايتا كەتەيىك، №2 گ م ب اكۋشەرلىك بلوگىنا ورتا ەسەپپەن 370 كە جۋىق شالا تۋعان بالا تۇسەدى.
«بالا 5 - اقپان كۇنى دۇنيەگە كەلدى، سالماعى - 960 گرامم، بويى - 42 س م. وتە كىشكەنتاي بولعانمەن دەنساۋلىعى جاقسى بولدى»، - دەيدى نەوناتولوگ- رەانيماتولوگ شولپان نۇراشبەكوۆا. بالاعا باتىر ەسىمى بەرىلدى. ول 27 اپتادا كەسار تىلىگى ارقىلى دۇنيەگە كەلدى، ويتكەنى اناسىنىڭ سۋى از، ياعني حوريوامنيونيت بولدى. قازىرگى ۋاقىتتا جاڭا تۋعان نارەستەنىڭ سالماعى - 1345 گرامم. بالا تۋعان ساتتەن باستاپ دارىگەرلەردىڭ باقىلاۋىندا. دارىگەرلەر قازاق حالقىنىڭ ءداستۇرىن ساقتاپ، اۋرۋحانا قابىرعاسىندا «قىرقىنان شىعارۋ» ءراسىمىن وتكىزدى. بۇگىندە ءسابي 40 كۇن بويى جاڭا تۋعان نارەستەلەردىڭ رەانيماتسيا بولىمشەسىندە جاتىر. گەموديناميكاسى تۇراقتى.
«بۇل - مەنىڭ ءۇشىنشى بالام. مەن دە، وتباسىم دا №2 گ م ب اكۋشەرلىك بلوگىنداعى مەديتسينا قىزمەتكەرلەرىنە، جاڭا تۋعان نارەستەلەردى رەانيماتسيالاۋ بولىمىنە جاۋاپكەرشىلىگى، ەڭبەكقورلىعى مەن مەيىرىمى ءۇشىن وتە ريزامىز. مۇندا ەڭ مىقتى دەگەن كاسىبي مەديتسينالىق كوماندا جاساقتالعان. وتباسىلارىڭىزعا دەنساۋلىق، باقىت، اماندىق، بارلىق يگىلىك جانە تىلەكتەرىڭىزدىڭ ورىندالۋىن تىلەيمىن. اتقارعان جۇمىستارىڭىزعا العىسىم شەكسىز»، - دەپ باتىردىڭ اناسى دارىگەرلەرگە العىس ايتتى.
ايتا كەتەيىك، قىرقىنان شىعارۋ - بالا ومىرىندەگى ەڭ قاسيەتتى سالت سانالادى. 40 كۇنگە دەيىن نارەستە ءۇشىن بۇل الەم قاۋىپتى دەپ ەسەپتەلەدى. سول سەبەپتى جۇرت كوزىنەن الشاقتا بولىپ، ەشكىمگە كورسەتىلمەيدى.
