ريو وليمپياداسىندا توپ جارعان قازاقستاندىقتار 95 ميلليون تەڭگەنى قالتاسىنا باسادى

اتاپ ايتقاندا، ۇكىمەتتىڭ 2014-جىلدىڭ 19- جەلتوقسانىنداعى 1345№ قاۋلىسىنا ساي التىن مەدال العان سپورتشىلارعا مەملەكەت تاراپىنان 250 مىڭ ا ق ش دوللارى بەرىلەدى. سونداي-اق، كۇمىس مەدال ءۇشىن - 150 مىڭ، ال قولا جۇلدەگە 75 مىڭ دوللاردان تاعايىندالعان.

بۇل تۋرالى مادەنيەت جانە سپورت مينيسترلىگىنىڭ باسپا ءسوز قىزمەتى حابارلادى.

سونىمەن قاتار، ۇزدىك التىلىققا ەنگەن سپورتشىلار دا سىياقىدان قۇر قالمايدى. ياعني، 4-ورىنعا - 30 مىڭ، 5-ورىنعا - 10 مىڭ جانە 6-ورىنعا 5 مىڭ دوللاردان بەرىلەدى.

ودان بولەك، سپورتشىلاردىڭ جەكە جاتتىقتىرۋشىلارىنا دا وسىنداي كولەمدە سىياقى قاراستىرىلعان.

بارلىق سىياقى دوللاردىڭ قازىرگى كۋرسى بويىنشا تەڭگەمەن بەرىلەدى. بۇل بيىلعى وليمپياداعا قاتىسۋشىلار سىياقىنى ءتورت جىل بۇرىنعى دودادا توپ جارعان سپورتشىلاردان ەكى جارىم ەسەگە كوپ الادى دەگەن ءسوز.

ءدال بۇگىن، ياعني 27- قاڭتار كۇنگى ۇلتتىق بانكتەگى ءبىر دوللاردىڭ تەڭگەگە شاققانداعى باعاسى 380 گە تەڭ. سوعان وراي، بيىل چەمپيون اتانعان ساڭلاق 95 ميلليون تەڭگەنى قالتاسىنا باسادى. ال لوندون وليمپياداسى وتكەن 2012-جىلدىڭ تامىز ايىندا ءبىر دوللاردىڭ باعاسى 149 تەڭگە بولىپ، «التىن» العاندارعا 37 ميلليون 250 مىڭ تەڭگەدەن بەرىلگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى