قازاقپاراتقا 95 جىل: اباي الەم حالىقتارىن دوستىققا شاقىرادى
ءبىزدىڭ رەسپۋبليكامىزعا اباي مەرەيتويىنىڭ سالتاناتىنا كەلگەن ازەربايجاننىڭ پرەزيدەنتى گەيدار اليەۆتى، يۋنەسكو-نىڭ باس ديرەكتورى فەدەريكو مايوردى، ب ۇ ۇ باس حاتشىسىنىڭ ارناۋلى وكىلى سامير سانباردى، وزبەكستاننىڭ پرەمەر-ءمينيسترى ابدۋلحاشيم مۋتالوۆتى، رەسەي فەدەراتسياسى ۇكىمەتى ءتوراعاسىنىڭ ورىنباسارى يۋري ياروۆتى جانە قىرعىزستاننىڭ پرەزيدەنتى اسقار اقايەۆتى تامىزدىڭ 9 ىندا پرەزيدەنت نۇرسۇلتان نازاربايەۆ قابىلدادى.
كەزدەسۋلەر بارىسىندا مارتەبەلى مەيماندار قازاقتىڭ ۇلى گۋمانيست-اقىنى، ويشىلى ءارى فيلوسوفى قالدىرعان مۇرانىڭ حالىقتار اراسىنداعى بايلانىستاردى كەڭەيتۋدە ماڭىزىنىڭ زور ەكەنىن اتاپ ءوتتى. سونداي-اق ءبىزدىڭ مەملەكەتتەرىمىزدىڭ ءوزارا ءتيىمدى ەكونوميكالىق ىنتىماقتاستىعىن ودان ءارى دامىتۋدىڭ ماسەلەلەرى كوتەرىلدى.
كەزدەسۋدەن سوڭ جۋرناليستەرمەن سۇحباتتاسقان گ. اليەۆ، بۇرىن قازاقستان مەن ازەربايجاننىڭ اراسىندا بەرىك شارۋاشىلىق بايلانىستارى بولعانىن، ازەربايجان جاعىنىڭ قازىر دە ولاردى قالپىنا كەلتىرۋگە ءازىر ەكەنىن ايتتى.
ف. مايور ابايدىڭ قازاقستان تاريحىندا جاڭا كەزەڭدى باستاپ بەرگەنىن مالىمدەدى. ونىڭ مۇراتتارى مەن ويلارى ويشىل ادامدى قالىپتاستىرۋدىڭ نەگىزى رەتىندە قارالادى، ادامنىڭ بويىندا ىزگى قاسيەتتەردى ۇيالاتىپ، زيالىلىق پەن جاراسىمدىلىققا شاقىرادى.
سوندىقتان دا ابايدىڭ ۇلىلىعى داۋسىز.
س. سانبار ءوز كەزەگىندە تاجىكستانداعى جانە بۇرىنعى يۋگوسلاۆياداعى جانجالداردى رەتتەۋدە ءبىزدىڭ ەلباسىمىزدىڭ بىتىمگەرشىلىك ءرولى بىرىككەن ۇلتتار ۇيىمىندا وڭ باعالانىپ وتىرعانىن، ءسويتىپ ۇلى ابايدىڭ دوستىق پەن بەيبىتشىلىك تۋرالى وسيەتتەرىن قازاقستاننىڭ جۇزەگە اسىرىپ وتىرعانىن اتاپ كورسەتتى.
ماسكەۋ مەن سانكت-پەتەربوردا، رەسەيدىڭ باسقا دا ايماقتارىندا ابايدىڭ مەرەيتويى سالتاناتپەن اتاپ ءوتىلدى، دەپ مالىمدەدى يۋ. ياروۆ. كوپتەگەن رەسەيلىكتەر ونىڭ شىعارماسىمەن باياعىدان تانىس، سوندىقتان دا قازاق حالقىنىڭ ۇلى پەرزەنتىن تاريحتاعى اسا كورنەكتى ويشىلدارمەن ءبىر قاتارعا قويادى.
(قازتاگ)
