شارتاراپتىڭ شارايناسى «قازاقپاراتقا» بۇگىن 94 جىل - فوتو
ەگەر ءبىز «قازاقپارات» قازاقستاننىڭ جىلناماشىسى سەكىلدى دەسەك، الدىڭعى بۋىن اعالاردان باستاپ، قازىرگى جاس بۋىن جۋرناليستەر دە كەلىسەر دەپ ويلايمىز. ويتكەنى، تاۋەلسىزدىككە دەيىنگى دە، بۇگىنگى جاڭا تاريحتىڭ دا كۋاگەرى بولىپ كەلە جاتقان اقپارات كوزدەرىنىڭ ءبىرى - قازاقپارات. وندا ەلىمىزدىڭ تىنىس تىرشىلىگىندەگى ءار ءسات سول قالپىندا دەرەۋ قاتتالىپ، مينۋت سايىن جاڭالىق بولىپ بىرنەشە تىلدە بار جاھانعا تارايدى.
اڭساعان ارمانىمىز تاۋەلسىزدىككە قول جەتكىزىپ، قازاقستان رەسپۋبليكاسى اتانىپ، العاشقى تاريحي قادامىن جاساعاندا قازاقپارات ەڭ العاش بولىپ، تاريحي جاڭالىقتىڭ جارشىسى بولدى. قازىرگى اقپاراتتىق داۋىردە باق- تىڭ سانى قانشالىقتى كوپ بولسا، سونشالىقتى قازاقپاراتتىڭ بەدەلى ۇستەم. سەبەبى، ول - سەنىمدى اقپارات كوزى عانا ەمەس، «جاڭالىقتار الەمىنىڭ» ۇستىنىنداي. ويتكەنى، ەلىمىزدىڭ بارلىق جەتىستىگى، تىنىس تىرشىلىگى ونىڭ نازارىنان تىس قالىپ كورگەن ەمەس. قازاقستاننىڭ جۇرەگى، بار قازاقتىڭ ماقتانىشى اياۋلى استانا دا «قازاقپاراتتىڭ» كوز الدىندا كوركەيدى. ەلباسى ءوز قولىمەن تۇرعىزعان اجارلى استانامىزدىڭ ءار كوشەسىندەگى قالت ەتكەن وزگەرىستى ءمۇلت جىبەرمەي ءدۇيىم جۇرتقا، ءتىپتى جەر جاھانعا قۋانا جار سالىپ، جاقسىلىقتى جاريا ەتۋگە اسىعاتىن دا وسى - قازاقپارات.
راس، «قازاقپارات» قوعامنىڭ ءار سالاسىندا قىزمەت ەتەتىن سان ءتۇرلى ماماندىق يەسى ءۇشىن دە ىزدەگەنىن تاباتىن، كورگەنىن الاتىن اشىق الاڭ. ول تاريحشى ىزدەگەن تاريحي دەرەكتى بەرسە، قالامگەردىڭ قاجەتىنە جاراپ، ساياساتكەردىڭ ءسوزى بولا ءبىلدى. قازاقپاراتتا وزگە وتاندىق اقپاراتتىق اگەنتتىكتەرىندە جوق تىلشىلەر جەلىسى بار. ونىڭ ىشىنە رەسەي، قىتاي، تۇركيا، ب ا ءا، بەلگيا، ازەربايجان، وزبەكستان، قىرعىزستان ەلدەرىندە مەنشىكتى تىلشىلەرى جۇمىس ىستەيدى. دەمەك، ەلىمىزدە جانە الەمدە بولىپ جاتقان جاڭالىقتاردى on-line رەجيمىندە جەدەل ءارى شىنايى تاراتىپ قانا قويماي، ءبىز بەيبىت قازاقستاننىڭ ءوز اقپارات كەڭىستىگىن كورسەتە بىلدىك.
قۇرمەتتى وقىرمان، قازاقپاراتتىڭ ءسوزى - ءسىزدىڭ ءسوزىڭىز، ونىڭ تۇراقتى ۇستانىمى، سەنىمدى قىزمەتى قاشان دا ەل قىزمەتىنە جاراۋعا ءازىر. قازاقپارات - قاراپايىم ءومىر مەن ساياسي بيلىكتىڭ التىن كوپىرى. ءسوز سوڭىندا، «مىڭ ەستىگەننەن ءبىر كورگەن ارتىق» دەگەندەي، وسى ايتىلعانداردى مىنا فوتورەپورتاجىمىز ارقىلى ويمەن ءبىلىپ بايقاڭىز، كوزبەن كورىپ قۋانىڭىز دەگىمىز كەلەدى.
«قازاقپاراتتىڭ» بۇگىنگى قۋانىشى بارشامىزعا قۇتتى بولسىن!
الماس مۇقاش ۇلى
«قازاقپارات» ح ا ا نازارىنداعى قازاقستان (فوتو)
