قوستاناي وبلىسىندا ورتتەن زارداپ شەككەندەرگە 91 ءۇي سالىنادى
«اۋليەكولدىڭ باس جوسپارىنا سايكەس جەر بولدىك. پرەمەر- ءمينيستردىڭ تاپسىرماسىمەن يندۋستريا جانە ينفراقۇرىلىمدىق دامۋ مينيسترلىگى بىزگە كومەك بەرىپ جاتىر. بىرگە جۇمىس توبىن قۇردىق، قازىر جۇمىستار جۇرگىزىلىپ جاتىر. قوستاناي وبلىسىندا جىلىتۋ ماۋسىمى ەرتە باستالادى. ياعني، قازان ايىندا. سول قازان ايىنىڭ سوڭىنا دەيىن ۇيلەردى سالىپ ۇلگەرۋىمىز كەرەك. 91 ءۇي سالىنادى. ونىڭ جوبالارىن قازىر تاڭداپ جاتىرمىز. الداعى 2-3 كۇندە بەكىتەمىز. سوسىن ءبىر اپتانىڭ ىشىندە قۇرىلىستى باستاۋعا تىرىسامىز. ول جۇمىستارعا ەڭ تاجىريبەلى مەردىگەرلەر تارتىلادى. ويتكەنى، ول تەز ءارى ساپالى سالىنۋى كەرەك»، - دەدى وبلىس اكىمى ارحيمەد مۇحامبەتوۆ.
ەسكە سالايىق، بۇعان دەيىن ورتتەن زارداپ شەككەندەر جاڭا ءۇي نەمەسە وتەماقى الۋ مۇمكىندىگى ۇسىنىلاتىنىن حابارلاعان بولاتىنبىز.
اۆتور
ءاليحان اسقار
