س ق و- دا «اڭساعان ءسابي» باعدارلاماسى بويىنشا 91 ايەل جاقىندا نارەستەلى بولماق
س ق و اكىمدىكتە وتكەن جيىندا ۆيرۋسقا قارسى قاۋىپسىزدىك ورتالىعىنىڭ باسشىسى قانىش بيجانوۆ دەنساۋلىق سالاسىندا اتقارىلعان جۇمىستاردىڭ كەيبىرىنە توقتالدى. ماماننىڭ ايتۋىنشا، بيىل وڭىردە پەريناتالدىق ورتالىق جانىنان گەنەتيكالىق زەرتحانا اشىلدى. بۇل جۇكتى ايەلدەردىڭ قۇرساعىنداعى شارانانىڭ تۋا ءبىتتى گەنەتيكالىق اۋىتقۋىن دەر كەزىندە انىقتاۋعا مۇمكىندىك بەرەدى. بۇعان دەيىن وبلىستىڭ 300 دەن استام جۇكتى ايەلى وسىنداي تەكسەرۋدەن ءوتۋ ءۇشىن رەسپۋبليكانىڭ باسقا وڭىرلەرىنە بارۋىنا تۋرا كەلەتىن. ال زەرتتەۋلەر اقىلى جاسالاتىن. ورتالىق اشىلعان 4 ايدىڭ ىشىندە 50 دەن استام بولاشاق انا تەگىن تەكسەرىلىپ، 8 جاعدايدا گەنەتيكالىق اۋرۋلار انىقتالدى.
«بۇل - ەلىمىزدىڭ سولتۇستىگىندە اشىلعان العاشقى زەرتحانا. دياگنوستيكالىق قىزمەتتى ەشقايدا بارماي- اق الۋ ايەلدەردىڭ جانە ولاردىڭ بالالارىنىڭ دەنساۋلىعىن ساقتاۋعا كومەكتەسەدى. سونداي- اق بيىل بالالارعا ارنالعان وڭالتۋ ورتالىعى اشىلدى. بۇرىن ەلوردادا نەمەسە شەتەلدە مامانداردىڭ كومەگىنە جۇگىنگەن 150 بالا ەم- دوم الدى»، - دەيدى قانىش بيجانوۆ.
س ق و- دا «اڭساعان ءسابي» باعدارلاماسى سۇرانىسقا يە. بيىل 218 ەرلى- زايىپتى ە ك و- دان وتۋگە جىبەرىلدى. ولاردىڭ 91 ءى جاقىندا كوپتەن كۇتكەن سابيلەرىن باۋىرلارىنا باسپاق. ياعني، باعدارلاماعا قاتىسقان جۇپتاردىڭ %41,7 ى ءسابي سۇيەدى.
