شىڭعا ورمەلەۋشىلەر 910 مەترلىك تاۋعا قولىمەن شىقتى
شىڭعا ورمەلەۋشى ەكى سپورتشى ا ق ش- تىڭ 910 مەترلىك ەل-كاپيتان تاۋىنا كومەكشى قۇرالداردىڭ كومەگىنسىز شىقتى، دەپ حابارلايدى National Geographic Russia.
ەل-كاپيتان گرانيتتى شىڭى امەريكانىڭ كاليفورنيا شتاتىنداعى يوسەميتي ۇلتتىق ساياباعىندا ورنالاسقان. بۇل سولتۇستىك امەريكاداعى تاۋلى مونوليت شىڭداردىڭ ءبىرى بولىپ تابىلادى.
ونىڭ شىڭىنا العاش رەت 1958 - جىلى ۋوررەن حاردينگ، ۋەين مەرري جانە دجوردج ۋيتمور 40 كۇننەن استام ۋاقىت ىشىندە كوتەرىلگەن. بۇل شىڭنان بەيسدجامپينگتىڭ نەگىزىن قالاۋشى كارل بەنيش ءوزىنىڭ العاشقى سەكىرۋلەرىن جاساعان.
ەل- كاپيتانعا جاقىندا جاسالعان كوتەرىلۋ تاريحي وقيعا بولىپ تابىلادى. ول 2014 - جىلدىڭ 27 - جەلتوقسانىندا باستالىپ، 19 كۇنگە سوزىلدى. وسى ۋاقىتتىڭ ىشىندە توممي كەلدۋەلل (Tommy Caldwell) مەن كيەۆين يورگەسون (Kevin Jorgeson) جەرگە تۇسپەي، قۇزداعى اسپالى پلاتفورمادا تۇرعان. جارتاسقا شىعۋشىلار كوتەرىلۋ ءۇشىن اياق- قولدارىن عانا پايدالانعان.
جارتاسقا كوتەرىلۋگە دايىندىققا (ءبىرىنشى كەزەكتە، وعان ىلگەكتەر مەن باسقا دا كومەكشى قۇرالداردى پايدالانۋسىز شىعۋ تەحنيكاسىن مەڭگەرۋ) كەلدۋەلل مەن يورگەسون 7 جىل ۋاقىتىن جۇمسادى.
ولاي بولعانىمەن، بۇل تەحنيكانىڭ ماشاقاتى كوپ، سپورتشىلارعا ساۋساقتارىنداعى جارالاردى ۇنەمى ەمدەۋگە تۋرا كەلەدى. ەسەسىنە ەندى ەل-كاپيتاندا كۇردەلىلىگى A9 دەپ اتالعان الەمدەگى العاشقى ۇلكەن شىڭ باعدارى جاسالدى. ول Dawn Wall اتاۋىنا يە بولدى.
36 جاستاعى كەلدۋەلل - الەمدەگى ەڭ تانىمال جانە «جۇرەكتى» شىڭعا ورمەلەۋشىلەردىڭ ءبىرى. تاۋعا العاش رەت اكەسىمەن بىرگە 3 جاسىندا كوتەرىلگەن. ول كوپتەگەن شىڭداردى باعىندىرعان، ەل- كاپيتاندا دا تالاي رەت بولعان - ءبىراق بۇعان دەيىن وعان ءداستۇرلى قۇرالداردىڭ كومەگىمەن شىعىپ كەلگەن.
