وكپەسىنىڭ 90 پايىزى زاقىمدانعان الماتىلىق كوروناۆيرۋستى قالاي جەڭگەنىن ايتىپ بەردى
«ءبىرىنشى كۇنى تاماعىم جىبىرلاپ اۋىردى. سودان كەيىن ىستىعىم 39 گرادۋسقا دەيىن كوتەرىلدى. دەنە قىزۋىم ون كۇن بويى تۇسپەدى. ءۇشىنشى كۇنى ماعان وكپەنىڭ ءىسىنۋى دياگنوزى قويىلدى. بەسىنشى كۇنى تىنىس الۋىم قيىنداپ كەتتى، سوندىقتان مەنى وكپەنى جاساندى جەلدەتۋ اپپاراتىنا قوستى»، - دەپ ەسكە الادى ەدۋارد كيم.
دارىگەرلەردىڭ تەكسەرۋىنەن كەيىن ونىڭ قوس وكپەسى %90 زاقىمدانعانى انىقتالىپ، پنيەۆمونيا دياگنوزى قويىلدى. سونىمەن قاتار، COVID-19 عا ارنالعان پتر تەست وڭ ناتيجە بەردى.
«ءوز بەتىمشە تىنىس الۋ وتە قيىن بولدى. كەۋدە تۇسىمدا قاتتى اۋىرسىنۋ پايدا بولدى. دەرت تەز دەندەپ كەتتى. جۇقپالى اۋرۋلار بولىمىنە تۇسكەن كەزدە مەن كوروناۆيرۋس ينفەكتسياسىن انىقتاۋ ءۇشىن پ ت ر تەستىن ءتورت رەت تاپسىردىم. بارلىق سىناق وڭ ناتيجە كورسەتتى»، - دەدى ەدۋارد كيم.
الماتىداعى №7 قالالىق كلينيكالىق اۋرۋحاناسىنىڭ جۇقپالى اۋرۋلار ءبولىمىنىڭ مەڭگەرۋشىسى ۇلجان اپباسوۆا اتاپ وتكەندەي، ناۋقاس اۋرۋحاناعا جەدەل جاردەممەن وتە اۋىر جاعدايدا جەتكىزىلدى. پاتسيەنتتە ۋرەميالىق ينتوكسيكاتسيا، ينتوكسيكاتسيا سيندرومدارى، سونداي- اق اۋا جەتىسپەۋشىلىگى بولدى.
«ناۋقاس اۋرۋحاناعا تۇسكەن كەزدە ەسىن ەمىس- ەمىس ءبىلدى. جاعدايى اۋىر بولدى. وزدىگىمەن ارەڭ دەمالدى. قابىلداۋ كەزىندەگى ساتۋراتسيا %82 بولدى. ناۋقاس شۇعىل تۇردە قارقىندى تەراپيا الدى، جاعدايى تۇراقتالعاننان كەيىن جۇقپالى اۋرۋلار بولىمىنە اۋىستىرىلدى. سونداي- اق، ناۋقاس اۋرۋحانادا بولعان كەزدە باعدارلامالانعان گەمودياليز سەانسىن قابىلدادى» ، - دەپ تولىقتىردى ۇلجان اپباسوۆا.
دارىگەردىڭ ايتۋىنشا، پاتسيەنت قاناعاتتانارلىق جاعدايدا ۇيىنە شىعارىلعان.
«اۋرۋحانادان ۇيىنە شىعارىلعان ناۋقاستىڭ جاعدايىن ۇنەمى قوڭىراۋ شالىپ ءبىلىپ وتىردىق. ول دارىگەرلەردىڭ باقىلاۋىندا بولدى. ناۋقاستىڭ تەز ساۋىعىپ، دەنساۋلىعىنىڭ جاقسارعانىنا قۋاندىق»، - دەدى ول.
ەدۋارد كيمنىڭ ايتۋىنشا، جاقسى نارسەنى ويلاۋ جانە جاقسىلىققا سەنۋ وعان اۋىر پنيەۆمونيا مەن كوروناۆيرۋستى جەڭۋگە كومەكتەستى.
«مەن نەگىزى پوزيتيۆتى اداممىن. ومىردە كەزدەسەتىن كەز كەلگەن قيىن جاعدايعا تۋرا قارايتىن جانمىن. كوروناۆيرۋس جۇقتىرعانىمدى بىلگەندە دەپرەسسياعا تۇسپەۋگە تىرىستىم. مەن ءبارى جاقسى بولادى دەپ سەندىم. مەنىڭ ءومىر سۇرگىم كەلدى، سوندىقتان اۋرۋمەن كۇرەستىم. ادام ءومىر بويى كۇرەسۋگە ءماجبۇر بولاتىن، ودان دا جامان اۋرۋلار بار عوي. قاسىمدا 60 جاستان اسقان ءبىر ناۋقاس جاتتى، ول دەپرەسسياعا ءتۇسىپ كەتتى. ول بارىنە پەسسيميستىك كوزقاراسپەن قارادى جانە ءوزىن ءولىم اۋزىندا جاتىرمىن دەپ سەندىردى»، - دەيدى ول.
سونىمەن قاتار، ول ءوزىن امان الىپ قالعان بارلىق مەديتسينا قىزمەتكەرلەرىنە العىسىن ايتتى.
«ماعان مەديتسينالىق كومەك كورسەتكەن بارلىق دارىگەرلەرگە ريزاشىلىعىمدى بىلدىرگىم كەلەدى، ولار - يرادا بيجكەنوۆا، ۇلجان اپباسوۆا جانە مەكەمەنىڭ بارلىق مەديتسينا قىزمەتكەرلەرى. بىلىكتى ماماندار جولىعىپ، شىنىمەن دە جولىم بولدى»، - دەپ قوستى ول.
ەدۋارد كيم ءومىر بويى جۇرگىزۋشى بولىپ جۇمىس ىستەگەن. ءقازىر ول بيزنەسپەن اينالىسادى. ەكى بالاسى مەن ءبىر نەمەرەسى بار.
«ءولىم اۋزىنان قالعان مەنىڭ ومىرگە دەگەن كوزقاراسىم وزگەردى. ءومىردىڭ ءار ءساتىن باعالاپ، دەنساۋلىعىما كوڭىل بولە باستادىم. باقىتىمىزعا وراي، وتباسىمىزدا كوروناۆيرۋسپەن مەن عانا اۋىردىم. ەندى سالاۋاتتى ءومىر سالتىن ۇستانامىن. قازىر بارلىق سانيتارلىق جانە قاۋىپسىزدىك ەرەجەلەرىن ساقتاۋعا تىرىسامىن»، - دەپ تۇيىندەدى اڭگىمەسىن ەدۋارد كيم.
