كاسىپكەرلەر نەسيەسىن 90 كۇنگە دەيىن تولەمەي، كەيىنگە شەگەرۋگە مۇمكىندىك الدى
مۇنداي جەڭىلدىك تۋرالى ۇكىمەت وتىرىسىندا قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى مادينا ءابىلقاسىموۆا ايتىپ بەردى، دەپ حابارلايدى قازاقپارات ءتىلشىسى.
«ق ر بانكتەر جانە بانك قىزمەتى تۋرالى زاڭىنىڭ 34-بابىنىڭ 3-تارماعىنا جانە ميكروقارجىلىق قىزمەت تۋرالى ق ر زاڭىنىڭ 3-بابىنىڭ 6-تارماعىنا سايكەس كرەديتورلار شارت تالاپتارىن قارىز الۋشى ءۇشىن جاقسارتقان جاعدايدا ولاردى ءبىرجاقتى تارتىپپەن وزگەرتۋگە قۇقىلى. وسىعان وراي بانكتەر جانە ميكروقارجىلىق ۇيىمدار توتەنشە جاعدايدىڭ ەنگىزىلۋىنە بايلانىستى قارجىلىق جاعدايى ناشارلاعان جەكە كاسىپكەرلەر مەن شوب سۋبەكتىلەرىنە نەگىزگى بورىش پەن سىياقىنى قوسا العاندا تولەم مەرزىمىن 90 كۇنگە دەيىنگى مەرزىمگە كەيىنگە قالدىرۋ جۇمىسىن جۇرگىزۋى ءتيىس»، - دەدى مادينا ءابىلقاسىموۆا ۇكىمەت وتىرىسىندا.
اگەنتتىك ءتوراعاسىنىڭ ايتۋىنشا، بانكتەر مەن نەسيە نارىعىنىڭ باسقا دا سۋبەكتىلەرى اتالعان شارالاردى حالىق پەن بيزنەسكە قولايلى بولۋى ءۇشىن بارىنشا قاشىقتان قاتىناس جاساۋ ارقىلى ىسكە اسىرادى. وسىلايشا قارىز الۋشىلارمەن ءوزارا ءىس-قيمىل جاساۋدىڭ ءتارتىبى مەن تەتىكتەرى ايقىندالادى.
ەسكە سالا كەتسەك، بۇعان دەيىن ءمادينا ءابىلقاسىموۆا بانكتە كرەديتى جانە لومباردتا قارىزى بار ازاماتتارعا قانداي جەڭىلدىكتەر جاسالاتىنىن ءمالىم ەتكەن ەدى.
اۆتور: ايان بەكەن ۇلى
