الماتى وبلىسىندا دانەش راقىشەۆتىڭ 90 جىلدىعىنا ارنالعان ەسكە الۋ كەشى ءوتتى - فوتو
داۋىلپاز تۇلعانىڭ تۋعان جەرى پانفيلوۆ اۋدانىندا «جەتىسۋدىڭ بۇلبۇلى، ءسوز ونەرىنىڭ ءدۇلدىلى» اتتى شارا الدىمەن ەسكەرتكىش باسىنا گۇل شوقتارىن قويۋدان باستالدى دەپ، - حابارلايدى قازاقپارات ءتىلشىسى.
تاۋەلسىزدىكتىڭ 25 جىلدىعىمەن تۇسپا-تۇس كەلگەن مەرەيتويعا جينالعان جۇرت جەلتوقسان قاھارماندارىن دا ەسكە الدى. ازاتتىق جولىندا قۇربان بولعان ءلاززات اسانوۆا مەن ەربول سىپاتايەۆتىڭ ەسكەرتكىشىنە گۇل شوقتارىن قويىپ، رۋحىنا تاعزىم ەتتى. بۇدان كەيىن قوناقتار دانەش راقىشەۆتىڭ ءومىرى مەن شىعارماشىلىعىنا ارنالعان كورمەنى تاماشالادى. وندا بەرىك ءابىلحانوۆ ەسىمدى ازامات انشىگە ارنالعان مەموريالدىق كەشەننىڭ جوقتىعىن ەسكەرىپ، ارنايى جوبا ازىرلەگەندىگىن ايتتى.
ونى اۋداندىق ونەر مەكتەبىنىڭ الدىنا قويسا دەگەن ۇسىنىسىن ءبىلدىردى. تورقالى تويدا جاركەنتتەگى ورتالىق كوشەنى دانەش ەسىمىمەن الماستىرۋ كەرەكتىگى كوتەرىلدى. سوندا اۋداننىڭ قوس بايتەرەگى ءابىلحان قاستەيەۆ پەن دانەش راقىشەۆتىڭ اتىمەن اتالاتىن كوشەلەر ءتۇيىسىپ، قوناقتاردى قۇشاق جايا قارسى العانداي اسەر قالدىرادى، - دەدى جازۋشى بەكسۇلتان نۇرجەكە ۇلى.
ۇلى تۇلعانى ۇلىقتاۋ شاراسىندا قوناقتاردى اۋدان اكىمى بەرداۋلەت ابدۋلدايەۆ قۇتتىقتاپ، «دانەش ءبىر تۋار دارا تۇلعا» اتتى بايانداما جاسادى. ال وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى اقان ابدۋاليەۆ وبلىس اكىمىنىڭ ىستىق ىقىلاسىن جەتكىزدى. وڭىردە دانەش اتامىزدىڭ تورقالى تويىنا وراي وتكىزىلگەن شارالاردى تىزبەكتەپ بەردى. سوعان ۇيىتقى بولعان نۇرجان جانپەيىسوۆپەن گۇلنار دانەش قىزىنا العىس حاتتارىن تابىس ەتتى.
ق ر حالىق ءارتىسى، ءانشى، سازگەر دانەش راقىشەۆ - حالىقتىق ونەردىڭ ءىنجۋ-مارجانىن بويىنا سىڭىرە بىلگەن ەرەكشە تالانت يەسى. كۇللى قازاق دالاسىن اسەم انىمەن الديلەدى. ونىڭ ولەڭدەرى ەلىمىزبەن قاتار قىتاي، موڭعوليا، قىرعىزستان سىندى مەملەكەتتەردىڭ دە اسپانىندا قالىقتاعان. جەزتاڭداي ءانشى عاسىرلار بويى قالىپتاسقان باي، مادەني، رۋحاني مۇرامىزدىڭ تولىعۋىنا دا سۇبەلى ۇلەس قوستى. ول حالىق سازگەرى اسەت نايمانبايەۆتىڭ شىعارمالارىن ەلگە اكەلىپ قايتا جاڭعىرتتى.
اۆتور: سامال قابىشەۆا
