جاپونيادا ۇزاق جاساعانداردىڭ 90 پايىزى - ايەلدەر
ەل حالقىنىڭ 25,9 پايىزى نەمەسە 33 ميللليونعا جۋىق ادام - 65 جاستان اسقان قاريالار. جاپونيانىڭ ءاربىر سەگىزىنشى تۇرعىنى 75 جاستان اسقان: بۇل حالىقتىڭ 12,5 پايىزى نەمەسە 15,9 ميللليون ادام. بۇل كورسەتكىش 1950-جىلدان بەرى جۇرگىزىلىپ كەلە جاتقان ستاتيستيكا تاريحىنداعى رەكوردتىق كورسەتكىش. ەڭ قىزىعى - جاسى 100 دەن اسقان ادامدار 1963-جىلى نەبارى 153 ادام بولسا، قازىر ولاردىڭ قاتارى 58820 ادامعا جەتكەن. ءار جىل سايىن ۇزاق ءومىر سۇرەتىن ادامدار سانى 3000-4000 ادامعا كوبەيىپ وتىر.
ءومىر ۇزاقتىعى دا ءوسىپ كەلەدى. بيىلعى جىلى جاپونيادا ەرلەردىڭ ءومىر ءسۇرۋىنىڭ ورتاشا ۇزاقتىعى 80 جاستان اسىپ، 80,21-جىلعا جەتسە، ايەلدەر جاسىنىڭ ۇزاقتىعى 0,2-جىلعا ارتىپ، 86,61 جاستى قۇرادى. جەر ۇستىندەگى ەڭ قارت ادامدار دا جاپوندىقتار: ولار - 111 جاستاعى ساكاري موموي جانە 116 جاستاعى ميساو وكاۆا، ولاردىڭ ەسىمدەرى گيننەستىڭ رەكوردتار كىتابىنا ەنگەن.
دەنساۋلىق ساقتاۋ، ەڭبەك قورعاۋ جانە الەۋمەتتىك قامسىزداندىرۋ مينيسترلىگى ۇسىنعان مالىمەتتەر بويىنشا، ەلدەگى ۇزاق جاساۋشىلاردىڭ باسىم بولىگى - ايەلدەر. ولار عاسىردان ۇزاق جاساعاندار اراسىندا 90 پايىزدى قۇرايدى. جاپونيا كەيۋانالار ەلى دەپ ايتۋعا بولادى، ال بالالار وتە از: حالىقتىڭ 13 پايىزى عانا 15 جاسقا دەيىنگىلەر.
جاپوندىقتاردىڭ ءومىر جاسىنىڭ ۇنەمى ءوسىپ وتىرۋىن مينيسترلىك شەنەۋنىكتەرى مەديتسينا دامۋىنىڭ جوعارى دەڭگەيىمەن جانە قارت ادامدارعا جاسالىپ وتىرعان جاقسى تۇرمىس جاعدايلارىمەن بايلانىستىرادى.
