قازاقستاندا بەدەۋلىكتى 90-95 پايىزعا ەمدەۋگە بولادى
مۇنداي پىكىردى بۇگىن ەلوردادا ءوتىپ جاتقان قازاقستاننىڭ رەپرودۋكيۆتى مەديتسينا قاۋىمداستىعىنىڭ 9- حالىقارالىق كونگرەسى اياسىندا ب ا ق وكىلدەرىنە سۇحبات بەرگەن «ەكومەد» ادام ۇرپاعىن ءوربىتۋ ەمحاناسىنىڭ عىلىمي ديرەكتورى سالتانات بايقوشقاروۆا ايتتى، دەپ حابارلايدى قازاقپارات.
«بەدەۋلىك تەك ايەلدىڭ عانا ەمەس ەركەكتىڭ دە پروبلەماسى. ەكەۋىنىڭ ارا جىگىن پايىزبەن ەسەپتەر بولساق، وندا بەدەۋلىك ەلۋدە ەلۋ دەۋگە بولادى. ونىڭ سەبەبى وتە كوپ. ءبىراق، كوبىنە بەدەۋلىك تۋا بەرىلمەيدى، ادامنىڭ ءومىر ءسۇرۋ سالتىنا بايلانىستى پايدا بولادى. بەدەۋلىكتىڭ ءتۇرى كوپ. ول كوبىنەسە قابىنۋ پروتسەسىنەن بولعان جاتىر تۇتىكشەلەرىنىڭ بىتەلۋى سياقتى فيزيالوگيالىق قابىلەتتىڭ تومەندەۋىنەن تۋىنداپ جاتادى»، - دەدى ول.
ەمحانا ديرەكتورىنىڭ دەرەگىنشە، بۇگىندە بەدەۋلىك وتباسىلاردىڭ 15-20 پايىزىندا كەزدەسەدى. ياعني، ءاربىر 5-، 6-وتباسى بەدەۋلىك ماسەلەسىمەن بەتپە-بەت كەلىپ وتىر.
«ونىڭ ەمى بار. جالپى، تۋا بىتە بەرىلەتىن بەدەۋلىك وتە از كەزدەسەدى. ال ەندى بۇگىنگى مەديتسينانىڭ، بيولوگيالىق جەتىستىكتەردىڭ جانە دەنەدەن تىس ۇرىقتاندىرۋ ءادىسىنىڭ ارقاسىندا بەدەۋلىكتى 90-95 پايىزعا ەمدەۋگە بولادى. قازاقستاندا ونىڭ بارلىق مۇمكىندىگى بار»، - دەدى بايقوشقاروۆا.
ونىڭ سوزىنە قاراعاندا، جاساندى ۇرىقتاندىرۋدىڭ تابيعي ۇرىقتاندىرۋدان اسا ايرماشىلىعى جوق.
«تابيعي ۇرىقتاندىرۋدىڭ، ياعني تابيعي جولمەن بالا تابۋدىڭ ءوزى 100 پايىز ەمەس. دەمەك، جاس ايەل كۇيەۋگە تيگەننەن كەيىن 12 ايدىڭ ىشىندە ەكىقابات بولۋى كەرەك. ەكستراكورپورالدى ۇرىقتاندىرۋ ودان ەكى ەسە ناتيجەلى، ەكى ەسە جىلدام جۇكتى بولۋعا مۇمكىندىك بەرەدى. ءبىراق، ول بەدەۋ بولعان جاعدايدا عانا قولدانىلادى. قازىرگى تەحنولوگيالار بەدەۋلىگى بىرنەشە جىل بۇرىن پايدا بولعان ايەلدەر مەن ەركەكتەرگە دە كومەك بەرە الادى. ايەل مەن ەر ادامنىڭ توسەك قاتىناسىنان كەيىن بالا پايدا بولا بەرمەيدى. تابيعاتتىڭ زاڭى سولاي. ياعني، ءبىر ايدا جاس ايەلدىڭ بالا كوتەرۋ مۇمكىندىگى 15-20 پايىز عانا. سوندىقتان دەنەدەن تىس ۇرىقتاندرۋ ارقىلى 100 پايىز كەپىلدىك سۇراۋ ورىنسىز»، - دەدى سالتانات بايقوشقاروۆا.
