برازيليانىڭ بۇرىنعى پرەزيدەنتى 9,5 جىلعا سوتتالدى
ءتيىستى ۇكىم وڭتۇستىك امەريكالىق رەسپۋبليكانىڭ فەدەرالدىق سوت ورگاندارىنىڭ رەسمي سايتىندا جاريالاندى، دەپ حابارلايدى قازاقپارات تاسس اگەنتتىگىنە سىلتەمە جاساپ. بۇل برازيليا تاريحىندا مەملەكەت باسشىسى سىبايلاس جەمقورلىق ءۇشىن سوتتالعان العاشقى جاعداي. سوت ۇكىمى لۋلا دا سيلۆا تاياۋ ۋاقىتتا قاماۋعا الىناتىنىن بىلدىرمەيدى. برازيليالىق زاڭناماعا سايكەس، سوتتالۋشى اپەللياتسياعا بەرگەن جاعدايدا، ايىپتاۋ ۇكىمىن ەكىنشى ينستانسيا سوتى راستامايىنشا ول بوستاندىقتا بولادى.
بۇل ازىرگە ءبىرىنشى ينستانسيا شەشىمى. قىلمىستىق ءىس گۋارۋجا (سان- پاۋلۋ شتاتى) كۋرورتتىق قالادا ورنالاسقان ءۇش دەڭگەيلى پاتەرگە قاتىستى بولدى. 2016 -جىلعى قىركۇيەكتە پرەزيدەنتكە 3,7 ميلليون رەال (سول كەزدەگى باعام بويىنشا 1,1 ميلليون دوللار) سوماسىندا اقشا جىمقىردى جانە سىبايلاس جەمقورلىققا باردى دەگەن ايىپتار تاعىلدى. قازىرگى ۋاقىتتا لۋلا دا سيلۆا سىبايلاس جەمقورلىققا قاتىستى تاعى 4 قىلمىستىق ءىستىڭ فيگۋرانتى بولىپ وتىر. برازيليالىق زاڭناماعا سايكەس، ەگەر ەكس- پرەزيدەنت اتالمىش پروتسەسستەردىڭ ءبىرى بويىنشا ايىپتى دەپ تانىلسا، ول سايلاناتىن لاۋازىمدارعا ۇمىتكەر بولۋ قۇقىعىنان ايىرىلادى.
