استانالىق 8 جاستاعى شاحماتشى لاتۆيانىڭ ەكس-ءمينيسترىن جەڭدى
لاتۆيانىڭ بۇرىنعى ەكونوميكا ءمينيسترى جانە قارجى ءمينيسترى، قازىرگى FIDE اتقارۋشى ديرەكتورى دانا رەيزنيتسە-وزولا الماتى جانە استانا شاحمات اكادەميالارىنىڭ 24 وقۋشىسىمەن ءبىر مەزگىلدە ويىن سەسسياسىن جانە الماتىداعى اعىمداعى الەم چەمپيوناتىنىڭ ايەل قاتىسۋشىلارى ءۇشىن شەبەرلىك سىنىبىن وتكىزدى.
«مەن شاحماتتان ماقساتىما جەتۋ، كوپ ەڭبەك ەتۋ جانە ۋاقىتتى باعالاۋ سياقتى كوپ نارسەنى ۇيرەندىم. شاحماتتا عانا ەمەس، ومىردە كوپ جەتىستىككە جەتكىڭىز كەلسە، بۇل ويىن سىزگە كومەكتەسەدى. تەك كوپ ەڭبەك ەتۋ كەرەك، سوندا عانا جەتىستىككە جەتەسىز» - دەدى دانا رەيزنيتسە-وزولا سەسسيانىڭ جاس قاتىسۋشىلارىنا.
Chesstar Chess شاحمات مەكتەبىنىڭ وقۋشىسى 8 جاسار كارىم ايتجاننىڭ تاقتاسىندا گروسسمەيستەر ادەتتەگىدەن ۇزاعىراق تۇرىپ، ءوزىنىڭ ءجۇرىسى تۋرالى ۇزاق ويلاندى. ناتيجەسىندە 8 جاسقا دەيىنگى قازاقستاننىڭ كۇمىس جۇلدەگەرى جانە بليتستەن ازيانىڭ كۇمىس جۇلدەگەرى كارىم ايتجان گروسسمەيستەرمەن ويىندا جەڭىسكە جەتتى.
«مەن جەڭەتىنىمە سەنىمدى بولمادىم جانە گروسسمەيستەرمەن ويناۋدىڭ ارتىقشىلىقتارىن كوردىم، ءتىپتى تەڭ ويىندى ۇسىندىم، ءبىراق كەيىنىرەك مەن ويىننىڭ باعىتىن وزگەرتە الدىم. ارينە وڭاي بولعان جوق. شەبەرمەن ويناۋ قيىن»، - دەيدى جاس شاحماتشى.
ايتا كەتەيىك، الماتىداعى بالۋان شولاق اتىنداعى سپورت جانە مادەنيەت سارايىندا شاحماتتىڭ راپيد جانە بليتس تۇرىنەن الەم چەمپيوناتى ءوتىپ جاتىر. جاھاندىق دوداعا 50 ەلدىڭ ۇزدىك 290 شاحماتشىسى قاتىسادى. اشىق تۋرنيرگە 176 ويىنشى قاتىسادى. سايىستىڭ فاۆوريتى سوڭعى 10 جىلداعى الەم چەمپيونى ماگنۋس كارلسەن (نورۆەگيا). ايەلدەر تۋرنيرىندە 100 دەن استام سپورتشى باق سىنايدى. قازاقستاننىڭ نامىسىن الەمگە ايگىلى شاحماتشىلار جانسايا ابدىمالىك پەن ءبيبىسارا اساۋبايەۆا قورعايدى.
