ورمانعا ادەيى وت قويعاندار 8 جىلعا دەيىن باس بوستاندىعىنان ايىرىلادى – ىشكى ىستەر مينيسترلىگى

ىشكى ىستەر مينيسترلىگى تەرگەۋ دەپارتامەنتىنىڭ باسقارما باسشسى ەرمەك شۇلدەن ءمالىم ەتتى، دەپ حابارلايدى قازاقپارات ءتىلشىسى.

«ق ر ىشكى ىستەر مينيسترلىگى قولدانىستاعى زاڭناماعا سايكەس، ورمانداردى جويۋ نەمەسە زاقىمداعانى ءۇشىن قىلمىستىق جاۋاپكەرشىلىك كوزدەلگەنىن ەسكەرتەدى. ورمان قورىنا كىرەتىن جانە كىرمەيتىن اعاشتار مەن بۇتالاردى ءورت قويۋ ارقىلى نەمەسە قوقىسپەن لاستاپ، وزگە دە ارەكەتپەن قاساقانا جويۋ نەمەسە زاقىمداۋ ق ر قىلمىستىق كودەكسىنىڭ 341-بابىمەن سارالانادى. اتالعان ارەكەت اۋىر قىلمىستار ساناتىنا جاتادى جانە ول ءۇشىن مۇلكىن تاركىلەي وتىرىپ، 8 جىلعا دەيىن باس بوستاندىعىنان ايىرۋ جازاسى كوزدەلگەن»، - دەدى ءى ءى م تەرگەۋ دەپارتامەنتىنىڭ باسقارما باستىعى ەرمەك شۇلدەن.

ەسكە سالايىق، بۇعان دەيىن قوستاناي وبلىسىنداعى ورتكە بايلانىستى 3 قىلمىستىق ءىس قوزعالعانىن حابارلاعان بولاتىنبىز.

اتاپ ايتقاندا، قىلمىستىق كودەكستىڭ 204-بابىنىڭ 2-بولىگى ، 341-بابىنىڭ 1-بولىگى، 292-بابىنىڭ 3-بولىگى بويىنشا سوتقا دەيىنگى تەرگەۋ باستالدى.

سونىمەن قاتار، توتەنشە جاعدايلار ءمينيسترى يۋري يلين ءورت قاساقانا ادام قولىنان بولدى دەگەن نۇسقانى جوققا شىعارمايتىنىن ءمالىم ەتتى.

ويتكەنى، ءورت الدىندا نايزاعاي ءتۇسۋ وقيعالارى تىركەلمەگەن. ونىڭ ايتۋىنشا، ءىستى تەگەۋ بارىسىندا ءار ءتۇرلى نۇسقالار قاراستىرىلادى.

بۇعان دەيىن حابارلاعانىمىزداي، قوستاناي وبلىسىنا قاراستى اۋليەكول اۋدانىنداعى ءورت سالدارىنان 98 ءۇي ورتەنىپ كەتكەن.

سونداي-اق، ءتىلسىز جاۋ 1936 -جىلى تۋعان ءبىر تۇرعىننىڭ ءومىرىن جالمادى. ال ءورت كەزىندە 10 ادام جاراقات الدى. ونىڭ تورتەۋى قازىر اۋرۋحانادا جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى