لاۋازىمدى تۇلعالار ءبىر قىزمەتتى 8 جىلدان ارتىق اتقارا المايدى
2021 -جىلدىڭ 1-قاڭتارىنان باستاپ قولدانىسقا ەنگىزىلەتىن قاعيدا تالاپتارىنا ساياسي قىزمەتشىلەردىڭ دە روتاتسياسى ەنگىزىلىپ وتىر. بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن بريفينگىدە ق ر مەملەكەتتىك قىزمەت ىستەرى اگەنتتىگىنىڭ تۇركىستان وبلىسى بويىنشا دەپارتامەنت باسشىسىنىڭ ورىنباسارى ەرلان ەرماحانبەتوۆ ءمالىم ەتتى، دەپ حابارلايدى قازاقپارات.
ونىڭ سوزىنشە، ساياسي جانە «ا» كورپۋسىنىڭ قىزمەتشىلەرى ءوز لاۋازىمدارىنا تاعايىندالعان كۇنىنەن باستاپ ءتورت جىلدان كەيىن روتاتسيالاۋعا جاتادى.
«بۇل رەتتە، ۋاكىلەتتى ادامنىڭ (ورگاننىڭ) شەشىمى بويىنشا مەملەكەتتىك ساياسي قىزمەتشىنىڭ اتقاراتىن لاۋازىمىندا بولۋ مەرزىمى ەكى جىلعا ۇزارتىلۋى مۇمكىن. ودان ءارى وسى مەملەكەتتىك ساياسي قىزمەتشىنىڭ اتقاراتىن لاۋازىمىندا بولۋ مەرزىمىن ق ر پرەزيدەنتى جانىنداعى كادر ساياساتى جونىندەگى ۇلتتىق كوميسسيانىڭ شەشىمىمەن تاعى ەكى جىلعا ۇزارتۋعا جول بەرىلەدى. ياعني، ساياسي جانە «ا» كورپۋسىنىڭ قىزمەتشىسى ءبىر لاۋازىمدى جالپى العاندا سەگىز جىلدان ارتىق اتقارا المايدى. ايتا كەتسەم، قازىرگى تاڭدا تۇركىستان وبلىسىندا قىزمەتتەگى 6603 مەملەكەتتىك قىزمەتشىنىڭ 22 ءى ساياسي، 1 قىزمەتشى «ا» كورپۋسىنىڭ قىزمەتشىسىن قۇرايدى»، - دەدى ە. ەرماحانبەتوۆ.
سونداي- اق، 1-قاڭتاردان باستاپ ءارتۇرلى وڭىردە، رەسپۋبليكالىق ماڭىزى بار قالالاردا جۇمىس ىستەيتىن وبلىس اكىمدىگىنىڭ باسقارما باسشىلارىن ءبىر- ءبىرىنىڭ ورنىنا تاعايىنداۋعا رۇقسات بەرىلەدى. بۇل رەتتە، «ب» كورپۋسىنىڭ قىزمەتشىسى ءوز لاۋازىمىنا تاعايىندالعان كۇنىنەن باستاپ ءۇش جىلدان كەيىن روتاتسيالانادى. كەيىن، قىزمەتشىنىڭ لاۋازىمىندا بولۋ مەرزىمىن ۇلتتىق كوميسسيانىڭ شەشىمىمەن ودان ءارى ەكى جىلعا ۇزارتۋعا جول بەرىلەدى.
ايتا كەتەرىلىگى، ق ر پرەزيدەنتى جانىنداعى مەملەكەتتىك باسقارۋ اكادەمياسى مەن «بولاشاق» باعدارلاماسى تۇلەكتەرىنىڭ سانى وتكەن جىلدىڭ وسى كەزەڭىمەن سالىستىرعاندا %18 ارتقان. سونداي- اق، جيىنعا قاتىسقان ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ تۇركىستان وبلىستىق فيليالىنىڭ ديرەكتورى جانات مومىنقۇلوۆ مەملەكەتتىك قىزمەتشىلەردىڭ بىلىكتىلىگىن ارتتىرۋ بويىنشا اتقارىلعان جۇمىستاردى باياندادى.
«بيىل اكادەميانىڭ وبلىستىق فيليالى تۇركىستان وبلىس اكىمدىگى جانە ق ر مەملەكەتتىك قىزمەت ىستەرى اگەنتتىگى دەپارتامەنتىنىڭ قولداۋىمەن 1532 مەملەكەتتىك قىزمەتشىنى وقىتتى. ولار بىلىكتىلىكتەرىن ارتتىرىپ، قايتا دايارلاۋ كۋرستارىنان وتكەن»، - دەدى ج. مومىنقۇلوۆ.
