مەسسيدەن باعاسى قىمبات 8 فۋتبولشى

قازىر ەكەۋى دە الەمدەگى ەڭ قىمبات فۋتبولشىلاردىڭ ەڭ الدىڭعى قاتارىندا ەمەس. ارگەنتينالىق سۇرمەرگەن وندىقتا بولسا، پورتۋگالدىق ويىنشىنىڭ قۇنى، ءتىپتى تومەن.

نەمىستىڭ Transfermarkt ينتەرنەت باسىلىمى فۋتبولشىلاردىڭ قۇنىن باقىلاپ وتىرادى. سپورت تاقىرىبىنداعى ەڭ بەدەلدى سايتتاردىڭ ءبىرى. وسى ينتەرنەت باسىلىم اقپاراتى بويىنشا مەسسيدىڭ قازىرگى ترانسفەرلىك قۇنى - 112 ميلليون ەۋرو.

«بارسەلونا« كاپيتانىنان قىمبات 8 ويىنشى بار. ولار كىمدەر؟

8. دجەيدون سانچو - 117 ميلليون ەۋرو

دورتمۋندتىڭ «بورۋسسيا» كلۋبىندا دوپ تەپكەن العاشقى اعىلشىن ويىنشىسى، وسى - دجەيدون. تولىق ەسىمى - دجەيدون ماليك سانچو. فۋتبول الىپپەسىن «ۋوتفورد» كومانداسى اكادەمياسىندا ۇيرەنگەن.

14 جاسىندا «مانچەستەر سيتيگە» اۋىسقان. ءبىراق بۇل كوماندادا قالۋدى ۇيعارمادى. كەلىسىمشارتتى ۇزارتپايتىن بولعاندىقتان، كلۋب باسشىلىعى ويىنشىنى نەگىزگى قۇرامعا جاقىنداتقان جوق. 2017-جىلدىڭ 31- تامىزىندا نەمىس كومانداسىنىڭ ويىنشىسى اتاندى.

دجەيدون بۋندەسليگادا ءوزىن تاماشا قىرىنان تانىتا ءبىلدى. ۇزدىك ويىنشىلار قاتارىنان تۇسپەي كەلەدى. قازىرگى تاڭدا ۆينگەرگە (الاڭداعى قىزمەتى) قىزىعۋشىلىق تانىتىپ وتىرعان كوماندالار كوپ. فۋتبولشى «مانچەستەر يۋنايتەدتى» تاڭداۋى مۇمكىن دەگەن بولجام ءجيى ايتىلا باستادى.

7. كيەۆين دە برەينە - 120 ميلليون ەۋرو

بەلگيالىق فۋتبولشىنىڭ مانسابى وڭاي باستالماعان. «گەنت» پەن «گەنكتە» ويناپ، 2012-جىلى «چەلسي» ساپىن تولىقتىردى.

فۋتبولشى نەگىزگى قۇرامعا ىلىككەن جوق. كەيىننەن نەمىستىڭ «ۆەردەر» كلۋبىنا جالعا بەرىلدى. قايتا «اقسۇيەكتەر» قاتارىنا قوسىلسا دا، ورىن بۇيىرمادى.

ناتيجەسىندە «ۆولفسبۋرگكە» اۋىستى. وسى كوماندادا ەرەكشە ويىن مانەرىمەن كوزگە ءتۇستى. 2015 -جىلى «مانچەستەر سيتي» ويىنشىمەن 6 جىلعا كەلىسىمشارتقا قول قويدى.

جاراقاتىنا بايلانىستى وتكەن ماۋسىمدا ءبىراز ۋاقىت الاڭعا شىقپادى. دەگەنمەن ويىنشى مويىعان جوق. پرەمەر-ليگا ويىندارىندا ءوزىنىڭ بابىن قايتا بايقاتىپ كەلەدى.

6. حارري كەين - 120 ميلليون ەۋرو

بىرەۋ بۇل فۋتبولشىنىڭ اتىن حارري دەيدى، بىرەۋ گارري دەيدى. وزىڭىزگە قالاي ىڭعايلى، سولاي اتاساڭىز بولادى. اعىلشىندىق فۋتبولشى ءوزىن جاستايىنان تانىتا العان جوق.

«توتتەنحەمدە» تۇلەپ شىققانمەن، ءار كلۋبتا جالدا ءجۇردى. كەيىننەن بارىپ قانا نەگىزگى قۇرامعا ىلىگىپ، كوماندانىڭ جۇلدىزىنا اينالدى.

27 جاسقا كەلگەن اعىلشىن فۋتبولشىسى مانسابىندا ءىرى جەتىستىكتەرگە جەتە قويعان جوق. كەي ساراپشىلار وزگە كومانداعا اۋىسۋى جايلى كەڭەس ايتىپ كەلەدى. ءبىراق لوندوندىق كوماندا ۇزدىك ويىنشىسىنان ايىرىلعىسى كەلمەيدى.

5. مۇحاممەد سالاح - 120 ميلليون ەۋرو

بۇل فۋتبولشىنى مىسىردا، ءتىپتى انگليانىڭ وزىندە پەرعاۋىن (فاراون) دەپ اتايدى. مۇحاممەد سالاح تا كيەۆين دە برەينە سەكىلدى «چەلسيدە» جۇلدىزى جانباعان ويىنشى. ءريمنىڭ «روما» كلۋبىنا اۋىسقاننان كەيىن عانا الەم جۇرتى تاني باستادى.

باسىندا يتاليالىق كوماندا ءبىر ماۋسىمعا 5 ميلليون ەۋرو تولەپ العان. كەيىننەن 15 ميلليون ەۋرونى تولىقتاي تولەپ الدى. 2 جىلدان كەيىن «ليۆەرپۋل» بۇل فۋتبولشى ءۇشىن 42 ميلليون ەۋرو تولەدى. بۇل شىعىندارىنا بۇگىن وكىنبەيتىنى دە انىق.

4. ساديو مانە - 120 ميلليون ەۋرو

«ليۆەرپۋل» كومانداسى 42 ميلليون ەۋروعا ساتىپ العانىنا وكىنبەيتىن تاعى ءبىر ويىنشى، ول - ساديو مانە.

بۇل فۋتبولشى دا مۇحاممەد سالاح سەكىلدى قارا قۇرلىقتان شىققان، «پەرعاۋىنمەن» بىرگە چەمپيوندار ليگاسىن، ۋەفا سۋپەركۋبوگى مەن كلۋبتار اراسىنداعى الەم چەمپيوناتىندا جەڭىمپاز اتاندى.

ال وسى ماۋسىمداعى اعىلشىن پرەمەر-ليگاسىن ۇتاتىن مۇمكىندىكتەرى جوعارى. ءبىراق كوروناۆيرۋس پاندەمياسىنا بايلانىستى جاعداي تۇسىنىكسىز بولۋدا.

3. نەيمار - 128 ميلليون ەۋرو

برازيليالىق ءبىر كوماندانىڭ كوشباسشىسى بولارلىق ويىنشى. ءبىراق «بارسەلونادا» مەسسيدەن كەيىن بولسا، پ س ج كلۋبىندا كيليان مباپپەنىڭ كولەڭكەسىندە قالىپ قويدى دەپ ايتىلىپ ءجۇر.

جانكۇيەرلەر نەيماردان ءالى دە جارقىن ويىن ۇلگىسىن كۇتەدى. جىل وتكەن سايىن بۇل ويىنشىنىڭ دا قۇنى تومەندەپ بارادى.

2. راحيم ستەرلينگ - 128 ميلليون ەۋرو

كەيىنگى ءۇش ماۋسىمدا ۇزدىك ونەرىمەن ۇلگى بولا باستاعان ويىنشىلاردىڭ ءبىرى - راحيم ستەرلينگ. «ك پ ر» جانە «ليۆەرپۋل» اكادەمياسىندا ءتالىم العان فۋتبولشى قازىر ۇزدىكتەردىڭ ۇزدىگى. بۇل ويىنشىنىڭ تەگى - يامايكالىق.

ۋسەين بولتتىڭ وتانداسى جىلدام جۇگىرىپ قانا قويماي، دوپتى ۇرشىقشا يىرەدى. قازىر كوماندالاردىڭ كوبى ءوز قاتارىنان كورگىسى كەلەتىن ويىنشىلاردىڭ بىرىنە اينالدى.

1. كيليان مباپپە - 180 ميلليون ەۋرو

21 جاستان ەندى اسقان فرانسۋز فۋتبولشىسى الەم چەمپيونى عانا ەمەس، الەمدەگى ەڭ قىمبات فۋتبولشى دا.

«موناكودا» ويناپ جۇرگەندە فۋتبول جۇلدىزىنا اينالادى دەپ كۇتكەندەر كوپ ەمەس ەدى. جاسىنداي جارقىلداپ، كەيىننەن ەسىمى ەلەۋسىز قالعان فۋتبولشىلار قانشاما؟ ءبىراق مباپپە بۇل قاتاردان ەمەس ەكەنىن دالەلدەدى.

مەسسي مەن رونالدۋدان كەيىن ميلليونداعان بالالاردىڭ كۋميرىنە اينالدى. ەندىگى سۇراق، مباپپەنىڭ فرانسيا چەمپيوناتىندا مانسابىن جالعاستىرۋ جايى. قىزىعۋشى كوماندالار كوپ. پ س ج ساتار ما ەكەن؟

كوروناۆيرۋستىڭ سپورتقا تيگىزگەن سالقىنى از ەمەس. جانكۇيەرلەر اسىعا كۇتەتىن جارىستاردىڭ بارلىعى دەرلىك توقتادى. ونىڭ ىشىندە دوپ دودالارى دا بار. وسىنىڭ اسەرىنەن قازىر فۋتبولشىلاردىڭ قۇنى ايتارلىقتاي تومەندەگەن.

ايتپاقشى، كريشتيانۋ رونالدۋدىڭ قازىرگى ترانسفەرلىك قۇنى - 60 ميلليون ەۋرو. ەڭ قىمبات فۋتبولشىلار رەيتينگىندە 46-ورىندا تۇر.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى