ەلوردادا قازاق كۇرەسىنەن 8 - الەم بىرىنشىلىگى ءوتىپ جاتىر
«دۇنيەجۇزىلىك قازاق كۇرەسى فەدەراتسياسى 15 جىلدىڭ ىشىندە 52 مەملەكەتتە فەدەراتسياسىن اشقان بولاتىن. بۇگىن باستالعان الەم چەمپيوناتىنا 36 مەملەكەت قاتىسۋعا تىلەك ءبىلدىردى. 36 مەملەكەتتىڭ قىزدار جانە ەرلەر توبىنىڭ بالۋاندارى تولىق قۇرامدا كەلەتىنىن ايتقانىمەن، اۋا رايىنىڭ قولايسىزدىعىنا بايلانىستى 8 كوماندا جارىسقا كەشىگىپ قالدى. ياعني، 28 ەلدىڭ بالۋانى بوز كىلەمگە شىقتى»، - دەدى دۇنيەجۇزىلىك قازاق كۇرەسى فەدەراتسياسىنىڭ اتقارۋشى ديرەكتورى تالعات مازىبايەۆ تۋرنير بارىسىندا.
ونىڭ ايتۋىنشا، قازاق كۇرەسىنەن باعىن سىناماققا كەلگەن بالۋانداردىڭ ىشىندە دزيۋدو، ەركىن كۇرەس سىندى سپورت تۇرلەرىنەن اتى شىعىپ جۇرگەن سپورتشىلار بارشىلىق.
«وزبەكستان، گرۋزيا، موڭعوليا، لاتۆيا، بەلارۋس كوماندالارىنىڭ قۇرامىندا وليمپيادا ويىندارىنا قاتىسقاندار، سامبودان بىرنەشە دۇركىن چەمپيون اتانعان سپورتشىلار بار. جۇلدە قورى - 70 مىڭ ا ق ش دوللارىن قۇرايدى. ءار ورىندارعا ءبولىنىپ بەرىلەدى. دەمەۋشىلەر بۇكىل ەلدەن كەلگەن سپورتشىلاردىڭ كەلۋ- كەتۋگە شىعاتىن شىعىنىن كوتەرىپ وتىر. ويتكەنى، ءبىز قازاق كۇرەسى سەكىلدى دامۋشى كۇرەس تۇرىنەن سايىس وتكىزىپ جاتىرمىز. جاپوندار سەكىلدى ءوز كۇرەسىمىزدى العا جەتەلەۋ ءۇشىن اقشا سالۋىمىز كەرەك»، - دەيدى ول.
بۇگىن ەرلەر مەن قىزدار ءۇش- ءۇش سالماقتان، ەرتەڭ دە ءدال وسىنداي ءتارتىپ بويىنشا بوز كىلەمدە ءوزارا مىقتىنى انىقتايدى.
جارىستىڭ العاشقى جەڭىمپازى دا بەلگىلى بولدى. قىزدار اراسىنداعى 55 كەلى سالماقتا ءبىرىنشى ورىنعا زارينا ابدۋراحمانوۆا (تۇرىكمەنستان) يە بولسا، ەكىنشى جانە ءۇشىنشى ورىنداردى انارا رىسقۇلوۆا (قىرعىزستان) مەن ماريا لياتيري (گرەكيا) يەلەندى. 60 كەلى سالماقتا ءبىرىنشى ورىن گانسەتسەگ گانبولدتىڭ (مونعوليا) قانجىعاسىندا كەتتى. اتالمىش سالماقتا ەكىنشى جانە ءۇشىنشى ورىندى مەيىرىم مومىنوۆا (قىرعىزستان) مەن تولعاناي ابەۋوۆا (قازاقستان) مىسە تۇتتى.
تۋرنير تولىقتاي UWW رەسمي وكىلدەرى مەن حالىقارالىق دارەجەدەگى تورەشىلەرىنىڭ قاتىسۋىمەن وتكىزىلىپ جاتىر. جارىستى ۇيىمداستىرۋشىلار - بىرىككەن كۇرەس الەمى، نۇر- سۇلتان قالاسىنىڭ اكىمدىگى، دۇنيەجۇزىلىك «قازاق كۇرەسى» فەدەراتسياسى. الەم چەمپيوناتىنا دەمەۋشى - «Eurasian Resources Group».
ەسكە سالا كەتسەك، كەشە ەلوردادا الىس- جاقىن شەت ەلدەردىڭ وكىلدەرىنىڭ قاتىسۋىمەن دۇنيەجۇزىلىك «قازاق كۇرەسى» فەدەراتسياسىنىڭ حالىقارالىق كونگرەسى وتكەن بولاتىن. كونگرەس بارىسىندا اليك شپەكبايەۆ اتالعان فەدەراتسياسىنىڭ پرەزيدەنتى، ال اكتەر ءارى رەجيسسەر، قازاقستاننىڭ حالىق ءارتىسى دوسحان جولجاقسىنوۆ دۇنيەجۇزىلىك «قازاق كۇرەسى» فەدەراتسياسىنىڭ «قۇرمەتتى پرەزيدەنتى» بولىپ سايلاندى.
اۆتور: ايان بەكەن ۇلى
