يزرايلدە 8 ەل اسكەري- اۋە جاتتىعۋلارىنا قاتىسىپ جاتىر
قاتىسۋشىلار قيىندىقتى بىرلەسە جەڭۋدى الەمنىڭ ەڭ قاۋىپ- قاتەرلى ايماعىندا ۇيرەنبەك نيەتتە. بيىلعى جىلدىڭ ەڭ اۋقىمدى «كوك جالاۋ» اتتى اسكەري جاتتىعۋلارى يزرايلدە ءوتىپ جاتىر. وعان ءار ەلدەن 100-گە جۋىق جاۋىنگەرلىك ۇشاق پەن 500-دەي ۇشقىش تارتىلعان. ءتىپتى ءۇندىستاننان كەلگەن توپتى دا كەزدەستىرۋگە بولادى.
يتسحاق، يزرايلدىك ءا ءا ك ۇشقىشى:
- ماقساتىمىز - بىرلەسىپ جۇمىس ىستەۋدى ۇيرەنۋ. ءبىر تىلدە سويلەسۋ ءۇشىن اعىلشىن ءتىلىن قولدانامىز. بورتتىق جۇيەلەردى سينحرونداۋدا ماسەلەلەر تۋىنداعان ەدى. سەبەبى ءار ەلدىڭ تەحنيكاسى ءارتۇرلى. دەگەنمەن قولىمىزدان كەلدى. قازىر ورتاق جاتتىعۋلاردى ورىنداپ جاتىرمىز.
يزرايلگە 7 مەملەكەت ءوز ۇشقىشتارىن جىبەرگەن. امەريكا جانە فرانسۋز اۋە كۇشتەرى «يراك پەن ليەۆانت لاڭكەستىك توبىنا» قارسى كواليتسيانىڭ قۇرامىندا ارەكەت ەتكەندىكتەن، تاياۋ شىعىس ولار ءۇشىن تاڭسىق ەمەس. ال پولياكتار، يتاليالىقتار مەن گرەكتەر ءۇشىن بۇل ايماق كارتاداعى اق نۇكتە ىسپەتتەس. جالپى، ۇشقىشتار ءۇشىن بۇرىن- سوڭدى بولماعان كەڭىستىكتە ۇشۋ ۇلكەن تاجىريبە بولىپ ەسەپتەلەدى. ال جاتتىعۋدىڭ سوعىس الاڭىنا جاقىن جەردە ءوتۋى شەبەرلىكتەرىن شىڭداي تۇسەرى حاق.
فرانسيا ءا ءا ك ەسكادريلياسىنىڭ كومانديرى:
- ءبىز مۇندا ورتاق جوسپارمەن، ءار ەلدەن جانە يزرايلدىك ۇشقىشتاردىڭ قاتىسۋىمەن وتەتىن بىرلەسكەن جاتتىعۋ ءۇشىن كەلدىك. دايىندىق بىلىكتىلىكتى ارتتىرادى. ءبىز بىرگە ۇشىپ جاتىرمىز. امەريكالىق «فالكون»، فرانتسۋزدىق «ميراج»، نەمىستەردىڭ «تورنادو» جانە يتاليالىق «ەۆروفايتەر». ءار ەلدەن كەلگەن ءارتۇرلى ۇشاقتىڭ جاتتىعۋ ورىنداۋدا ءوز تاسىلدەرى بار.
قوناق قاتىسۋشىلاردىڭ باستى قارسىلاسى - جاتتىعۋ قوجايىندارىنا تيەسىلى « قىزىل ەسكادريليا». بۇل - يزرايلدىك اسكەري- اۋە كۇشتەرىنىڭ ەرەكشە بولىمشەسى. ولار ءوز قارسىلاستارىنىڭ ايلا- تاسىلدەرىن ەگجەي- تەگجەيلى زەرتتەپ، جاتتىعۋ كەزىندە وڭتايلى قولدانادى. جەردە دە جۇمىس جەتەرلىك. مۇندا اۋە قورعانىس اسكەرلەرى ارەكەت ەتەدى. ۇشقىشتار وسىنداي قاۋىپپەن دە كۇرەسۋى ءتيىس. جالپى، الداعى ەكى اپتادا يزرايل كەڭىستىگى تارلىق ەتۋى مۇمكىن. سەبەبى «كوك جالاۋ» جاتتىعۋى ءالى ەكى اپتا بويى جالعاسادى. وسىعان بايلانىستى ازاماتتىق لاينەرلەردىڭ كەستەسى وزگەرتىلگەن.
www.24.kz
