قازاقستان-قىتاي ىسكەرلىك كەڭەسى وتىرىسىندا 8 ميلليارد دوللاردىڭ كەلىسىمى راسىمدەلەدى
بۇگىن اقوردادا ەلىمىزگە رەسمي ساپارمەن كەلگەن ق ح ر ءتوراعاسى شي جينپيڭمەن شاعىن جانە كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ وسىلاي مالىمدەدى، دەپ حابارلايدى قازاقپارات.
مەملەكەت باسشىسى قىتاي-قازاقستان-ەۋروپا باعدارىمەن كونتەينەرلىك جۇك تاسىمالداۋ تۇراقتى ارتىپ، ەسەلەنە تۇسكەندىگىن اتاپ ءوتتى. 2020-جىلعا قاراي جۇك تاسىمالىنىڭ كولەمى جىلىنا 2 ميلليون كونتەينەرگە جەتەتىگىنە سەنىمدى ەكەندىگىن باسا ايتتى.
«وسىلايشا قازاقستان ماڭىزدى ترانزيتتىك ەلگە اينالىپ كەلەدى. بۇل ءبىزدىڭ مۇددەمىزگە ساي»، - دەدى ەلباسى.
نۇرسۇلتان نازاربايەۆ قازاقستان مەن قىتاي ىسكەرلىك كەڭەسىنىڭ جۇمىسىنا دا توقتالىپ ءوتتى.
«بۇگىن استانادا اتالعان كەڭەستىڭ ءتورتىنشى وتىرىسى ءوتىپ جاتىر. ونىڭ اياسىندا قازىر عانا سىزدەردىڭ قاتىسۋلارىڭىزبەن قول قويىلعان قۇجاتتاردان بولەك 8 ميلليارد دوللاردىڭ 20 عا جۋىق كوممەرتسيالىق كەلىسىمىنە قول قويىلاتىن بولادى»، - دەدى قازاقستان پرەزيدەنتى.
اۆتور: مارلان جيەمباي
