وسكەمەندە «پاروۆوزنايا» دەپ اتالاتىن 8 كوشە بار
وڭىردە ءتۇرلى ەڭبەكتەرىن باعالاۋعا تۇرارلىق كوپتەگەن ەتنوس وكىلدەرى بار. ولاردىڭ ەسىمدەرىمەن قاجەتتى كوشەلەر مەن ءتۇرلى نىسانداردى اتاۋعا بولادى. ونوماستيكالىق كوميسسيا وكىلدەرى بۇل ماسەلەنى وتە بايىپپەن، جان- جاقتى قاراپ شەشۋى كەرەك، دەدى شىعىس قازاقستان وبلىسىنىڭ اكىمى دانيال احمەتوۆ وبلىس اكىمدىگىنىڭ ماجىلىسىندە.
ماجىلىستە ونوماستيكالىق كوميسسيانىڭ سوڭعى 3 جىلدا اتقارعان جۇمىستارى ءسوز بولدى. ءوڭىر باسشىسى كوميسسيا وكىلدەرىن ەلدى مەكەندەر مەن وزگە دە نىساندارعا تۋعان- تۋىستاردىڭ ەسىمدەرىن بەرۋ تاجىريبەسىنەن ارىلۋ كەرەكتىگىن ەسكەرتتى.
بۇعان قوسا ول ونوماستيكالىق كوميسسيا وكىلدەرىن تاريحقا تىم تەرەڭ ۇڭىلمەۋگە شاقىردى. «ءبىزدىڭ وڭىرىمىزدە ەلىمىزدىڭ دامۋىنا زور ۇلەس قوسقان ازاماتتار جەتەرلىك. سوندىقتان ونوماستيكالىق كوميسسيا مۇشەلەرى وسى ماسەلەگە باسا نازار اۋدارا وتىرىپ، قانداي دا ءبىر نىسانعا ازاماتتاردىڭ ەسىمدەرىن بەرۋ كەزىندە وزگە ۇلت وكىلدەرىن دە نازاردان تىس قالدىرماۋ جاعىن ويلاستىرعاندارى ءجون»، - دەدى شىعىس قازاقستان وبلىسىنىڭ اكىمى.
ءماجىلىس بارىسىندا ءسوز سويلەگەن تىلدەردى باسقارۋ باسقارماسىنىڭ باسشىسى ايدىن شايماردانوۆتىڭ ايتۋىنشا، كوشەلەر مەن ەلدى مەكەندەردىڭ اتاۋلارىن وزگەرتۋ جۇمىستارى جۇيەلى تۇردە جۇرگىزىلىپ كەلەدى. بۇگىندى تاڭدا «مەكەنجاي ورتالىعى» اقپاراتتىق جۇيەسىندە شىعىس قازاقستان وبلىسى بويىنشا، 1086 اكىمشىلىك اۋماقتىق بىرلىكتەر مەن 7765 كوشە بار. الايدا، شايماردانوۆتىڭ ءوزى بۇل باعىتتاعى جۇمىستاردىڭ قاناعاتتانارلىقسىز ەكەندىگىن ايتتى.
مىسالى وبلىسى ورتالىعىندى وسى كۇنگە دەيىن «پاروۆوزنايا» دەگەن اتاۋمەن 8 كوشە بار. ولاردىڭ ءارقايسىسى قالانىڭ ءار اۋماعىندا ورنالاسقان. سونداي-اق «نەۆسكايا» دەگەن اتاۋمەن 3 كوشە بار. ولار دا ءار ايماقتا ورنالاسقان. سوڭعى 3 جىلدا ونوماستيكالىق كوميسسيا 7 رەت جينالدى. كوميسسيا تاراپىنان 3 اكىمشىلىك- اۋماقتىق بىرلىك پەن 46 نىساندى، 67 كوشەنىڭ اتاۋىن وزگەرتۋ بويىنشا ۇسىنىستار قارالدى. ولاردىڭ اراسىندا 2 ەلدى مەكەن مەن 33 نىساندى 57 كوشەنى وزگەرتۋ بويىنشا ءتيىستى شەشىمدەر قابىلداندى.
