بيىلعى جىلى كورەرمەنگە جول تارتاتىن قازاقستاننىڭ 8 ءتول فيلمى
اسقار ۇزابايەۆتىڭ «جول» (پۋت بوكسەرا) اتتى سپورتتىق دراماسى كوشە توبەلەسىنىڭ جاس وكىلى تۋرالى باياندايدى.
ول الماتىلىق «باراحولكادا» ءناپاقاسىن تاۋىپ ءجۇرىپ، تۇندە استىرتىن ۇيىمداستىرىلاتىن ەرەجەسىز جەكپە-جەكتەردە باعىن سىناپ جۇرەدى. ۋاقىت وتە كەلە كاسىپقوي بوكستىڭ داڭعىل جولى - ونىڭ ماڭدايىنا جازىلعان تاعدىر ەكەنىن ۇعىنادى.
قازاق كورەرمەندەرىنە تانىمال بولعان ەرمەك تۇرسىنوۆ «كەلىن» جانە «شال» كينوتۋىندىلارىنىڭ جالعاسىن بيىل ءتۇسىرىپ بىتپەك. «كەنجە» اتتى ەكشن-تريللەر اتالمىش تريلوگيانىڭ سوڭعى بولىگى بولماق. بۇل فيلمدە اعا مەن ءىنى اراسىنداعى تارتىس سۋرەتتەلەدى. اعاسى ادام ولتىرۋگە تاپسىرىس قابىلداپ وتىرادى، ال ونى ورىندايتىن - ءىنىسى.
بيىل ەكرانعا ەرمەك شىناربايەۆتىڭ «دالا ءۇنى» (گولوس ستەپي) رومانتيكالىق مەلوردراماسى جارىققا شىعادى. فيلمنىڭ باستى ءرولىن فرانسۋز اكتەرى جەرار دەپاردە سومدايدى. بۇل «قازاقفيلم» مەن فرانسۋز كينەماتوگرافتارىنىڭ بىرلەسكەن جوباسى. تۋىندى جەلىسى بويىنشا فرانسيالىق اناتول ەسىمدى اكۋستيكا مامانى مەن اباي ەسىمدى قازاق جىگىتتىڭ اينالاسىندا ءوربيدى. ولار قىزىق جاعدايدا كەزدەسىپ، ودان شىعار جولدى بىرگە تابادى. فيلم پاريج بەن استانا قالالارىنىڭ رۋحاني بايلانىسى تۋرالى اڭگىمەلەيدى.
ساتىبالدى نارىمبەتوۆ كورەرمەندەرگە «امانات» كينوسىن تارتۋ ەتپەك. شىعارما رەپرەسسياعا ۇشىراعان تاريحشى ەرمۇحان بەكماحانوۆ پەن كەنەسارى حاننىڭ ۇلت-ازاتتىق قوزعالىسى تۋرالى.
دوسحان جولجاقسىنوۆتىڭ ەكىنشى رەجيسسەرلىك ەڭبەگى - «قۇنانباي» كوركەم فيلمى - قازاقتىڭ ۇلى اقىنى، جازۋشى، اعارتۋشى اباي قۇنانبايەۆتىڭ اكەسى سالعان سارا جول جايىندا.
كومەديا جانرىنان دا بيىل كەندە قالمايسىزدار.
ەرلان نۇرمۇحامبەتوۆتىڭ «جاڭعاق اعاشى» (ورەحوۆوە دەريەۆو) جانە «16 قىز» اتتى ەكى كومەديا ۇسىنىلماق. ءبىرىنشى فيلم كەلىندى ۇرلاپ كەتۋمەن بايلانىستى. بارلىعى انانىڭ بالاسىنا نەمەرە ءسۇيۋ ارمانىنان باستالادى. ارى قاراي دوستاردىڭ كومەگى، ۇرىس-كەرىس، ازداعان تۇيتكىلدەر، توي جانە جاڭعاقتار. ەكىنشى فيلمنىڭ سيۋجەتى بەلگىسىز. سەبەبى ونى «قازاقفيلم» «KANAIDAR Production» كومپانياسىمەن بىرىگىپ تۇسىرەدى.
سونىمەن قاتار بيىل «ەلباسى جولى» كينوەپوپەياسىنىڭ جالعاسى تۇسىرىلمەك.
اۆتور: جاسۇلان جولدىبايەۆ
