جاپپاي تارتىپسىزدىك كەزىندە كەلگەن شىعىن 88 ميلليارد تەڭگەدەن استى - ءى ءى م

بۇل تۋرالى ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.

ىشكى ىستەر مينيسترلىگى قايعىلى قاڭتار وقيعاسىن تەرگەۋگە بەلسەندى قاتىسىپ جاتىر. بۇگىندە جاپپاي تارتىپسىزدىك كەزىندە زارداپ شەككەن نىساندار سانى 1573-كە جەتتى.

«اتالعان ستاتيستيكا زارداپ شەككەن ازاماتتاردىڭ وتىنىشىنە بايلانىستى ءبىرشاما ارتتى. ول تەرگەۋشىلەردىڭ تەكسەرۋى جانە زاقىمدالعان نىسانداردى تىركەۋ ارقىلى راستالدى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ اتاپ وتۋىنشە، ەڭ كوپ زارداپ شەككەن - بيزنەس نىساندارى.

«ولاردىڭ سانى 1502 گە جەتتى. باسىم بولىگى دۇكەندەر، لومباردتار، جانارماي قۇيۋ ستانتسيالارى مەن قوعامدىق تاماقتانۋ ورىندارى، سونداي-اق تولىقتاي تونالعان اڭشىلىق دۇكەندەر قۇرايدى. زاقىمدالعان نەمەسە جويىلعان اۆتوكولىكتەر سانى دا ارتىپ، 765 بىرلىككە جەتتى. ونىڭ ىشىندە 551 قىزمەتتىك پوليتسيا كولىگى جانە 124 قاراپايىم ازاماتتارعا تيەسىلى كولىك قۇرالدارى. جالپى ءمالىم بولعان شىعىن 88 ميلليارد تەڭگەدەن استى»، - دەپ اتاپ ءوتتى سانجار ءادىلوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى