قازاقستاندا 883 اۋىلدا ينتەرنەت جوق
بۇل تۋرالى ق ر سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى تەلەكوممۋنيكاتسيالار كوميتەتىنىڭ ءتوراعاسى ۆيتاليي ياروشەنكو مالىمدەدى، دەپ حابارلايدى قازاقپارات.
«قازىرگى ۋاقىتتا ينتەرنەتكە كەڭجولاقتى قولجەتىمدىكتى قامتاماسىز ەتەتىن جەلىلەر 6459 ەلدىمەكەننىڭ 4646-سىندا سالىنعان. بۇل رەتتە وسى ەلدىمەكەندەردە 18,2 ميلليون ادام، حالىقتىڭ % 97,3 تۇراتىنىن اتاپ وتكەن ءجون. Nur Otan پارتياسىنىڭ سايلاۋالدى تۇعىرناماسى بار، وندا جىل سوڭىنا دەيىن 250 جانە ودان دا كوپ ادام تۇراتىن بارلىق اۋىلدىق ەلدىمەكەندەردى ينتەرنەتپەن قامتاماسىز ەتۋ تاپسىرىلعان. قازىرگى ۋاقىتتا ينتەرنەتپەن قامتىلماعان 883 اۋىل قالدى»، - دەدى سپيكەر ورتالىق كوممۋنيكاتسيالار ورتالىعىندا وتكەن باسپا ءسوز ءماسليحاتىندا.
ونىڭ ايتۋىنشا، اۋىلداردى ينتەرنەتپەن قامتاماسىز ەتۋ ءۇشىن ەكى جوبا جۇزەگە اسىرىلۋدا. ءبىرىنشى جوبا «تالشىقتى- وپتيكالىق بايلانىس جەلىسى تەحنولوگياسى بويىنشا ەلدىمەكەندەردى كەڭجولاقتى قولجەتىمدىلىكپەن قامتۋ» دەپ اتالادى.
«جوبا بويىنشا مەملەكەت مەكتەپتەر، اۋرۋحانالار مەن اكىمدىكتەر ءۇشىن اۋىلدىق ەلدىمەكەندەردە ينتەرنەتكە كەڭجولاقتى قولجەتىمدىك قىزمەتتەرىن ساتىپ الادى. جوبا 2020 -جىلدىڭ سوڭىنا دەيىن 1257 اۋىلداعى 3718 مەملەكەتتىك ورگان مەن بيۋدجەتتىك ۇيىمداردى قامتيدى»، - دەدى ۆ. ياروشەنكو.
