ۇلتتىق قوردان كەپىلدەندىرىلگەن ترانسفەرت كولەمى 880 ميلليارد تەڭگەگە قىسقارادى

بۇل تۋرالى بۇگىن حالىقپەن ەسەپتىك كەزدەسۋ وتكىزۋ بارىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ ءمالىم ەتتى، دەپ حابارلايدى قازاقپارات.

«مينيسترلىك جۇرگىزىپ وتىرعان بيۋدجەتتىك ساياسات مەملەكەتتىك قارجىنىڭ تۇراقتىلىعىن قامتاماسىز ەتۋگە جانە ەكونوميكا وسىمىنە كومەك كورسەتۋگە باعىتتالعان. اعىمداعى جىلى مينيسترلىك ۇلتتىق قوردىڭ جاڭا تۇجىرىمداماسىن جۇزەگە اسىرۋعا كىرىستى»، - دەدى ول.

 ونىڭ ايتۋىنشا، ءۇشجىلدىق كەزەڭدە ۇلتتىق قوردىڭ اكتيۆتەرىن تۇراقتاندىرۋ ماقساتىندا ونى پايدالانۋدا ءبىرشاما قىسقارتۋ جوسپارلانىپ وتىر.

«3 جىل بويى ۇلتتىق قوردان كەپىلدەندىرىلگەن ترانسفەرت كولەمى 2020 -جىلدان باستاپ 880 ميلليارد تەڭگەگە، 2 تريلليون تەڭگەگە دەيىن قىسقاراتىن بولادى. وسىنى ەسكەرە وتىرىپ، اعىمداعى جىلدىڭ تامىزىندا 2018-2020 -جىلدارعا ارنالعان رەسپۋبليكالىق بيۋدجەتتى قالىپتاستىرۋ اياسىندا مينيسترلىك بيۋدجەت پارامەترلەرى مەن قىسقامەرزىمدى كەزەڭدە ۇلتتىق قوردىڭ بولجامىن ايقىندايتىن بولادى»، - دەدى سۇلەيمەنوۆ. سونىمەن قاتار ول بيۋدجەتتىك ساياساتتىڭ باستى مىندەتتەرىنىڭ ءبىرى مەملەكەتتىك شىعىستاردىڭ تيىمدىلىگىن ارتتىرۋ ەكەندىگىن باسا ايتتى.

 اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى