اقتوبە اكىمى 86 جاستاعى قارت ساتۋشىنى كورىپ ريزا بولدى
ايماق باسشىسى «تابىس» كوممۋنالدىق بازار ءىشىن ارالاپ جۇرگەنىندە، كەلەڭسىز جاعدايدىڭ كۋاسى بولدى.
بۇل تۋرالى aktobenews.kz جازدى.
باقىلاۋ تارازىسىنىڭ قاسىندا تۇرعان ساتىپ الۋشىلاردىڭ ءبىرى بەردىبەك ماشبەك ۇلىنا ەت ساتۋشىسىنىڭ ءوزىن باعادان جاڭىلىستىرعانىن ايتىپ شاعىمداندى. اكىم كىنالى ساتۋشىعا «بۇلاي حالىقتى الدايتىن بولساڭىز، سىزگە ساۋدا جاساۋعا رۇقسات بەرىلمەيدى!»، - دەپ قاتاڭ ەسكەرتۋ جاسادى.
ال بازاردا تۇرىپ، تارى مەن تالقان، قۇرت ساتاتىن 86 جاستاعى حانزادا اجەگە ءوڭىر باسشىسى ريزا بولدى. اجەيگە قاجەت ءونىمدى ايتەكە ءبي اۋدانىندا تۇراتىن كەلىندەرى دايىنداپ بەرىپ جىبەرەتىن كورىنەدى.
- «بويىمدا كۇش-قۋاتىم بار كەزدە وسىلاي جۇمىس جاساپ، ولارعا كومەكتەسكەنىمنىڭ نەسى ايىپ»، - دەيدى حانزادا اجەي.
قارت انانىڭ بەلسەندىلىگىنە ريزا بولعان وبلىس باسشىسى:
- «مىنە، قيت ەتسە جۇمىس جوق دەپ شاعىمداناتىن جاستارىمىز ءۇشىن ۇلگى بولار جان. حالىققا كورسەتىڭدەر. وسىنداي ادامدار تۋرالى جازۋ كەرەك»، - دەدى كەيۋاناعا ريزاشىلىعىن بىلدىرگەن ءوڭىر باسشىسى.
