ماقتاارالداعى سۋ باسقان ەلدى مەكەندەردە مالدىڭ 85 پايىزى قۇتقارىلعان

بۇل تۋرالى تۇركىستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى تۇرعانبەك وسپانوۆ بريفينگ بارىسىندا مالىمدەدى، دەپ حابارلايدى قازاقپارات ءتىلشىسى.

باسقارما باسشىسى ورىنباسارىنىڭ ايتۋىنشا، بۇگىنگى تاڭدا سارقىندى سۋدان ەڭبەكشى جانە جاڭا جول اۋىلدىق وكرۋگى زارداپ شەككەن.

«ماسەلەن، جاڭا جول اۋىلدىق وكرۋگىندە 404 ميلليون تەڭگەگە شىعىن كەلگەن. اعىندى سۋ 3602 گەكتار ەگىستىك جەرگە زاقىم كەلتىرسە، سونىڭ 85 پايىزى - ماقتا القاپتارى. قالعانى - باقشا ونىمدەرى. ماقتا القاپتارى مۇلدە جاراماي قالعان. ەڭبەكشى اۋىلدىق وكرۋگىنىڭ جاڭا تۇرمىس اۋىلى مەن جەڭىس ەلدى مەكەندەرىندە ءبىز شىعىندى ناقتى انىقتاي الماي وتىرمىز. سەبەبى، وندا جاپپاي سۋ باسقاندىقتان ىشىنە كىرىپ كورۋ مۇمكىن بولماي تۇر. ال، نۇرلىبايەۆ اۋىلدىق وكرۋگىنە دە سۋ بەتوننان ءوتىپ جاتىر»، - دەيدى تۇرعانبەك وسپانوۆ.

بۇگىندە توتەنشە جاعداي قالىپتاسقان ايماققا 95 اۋىل شارۋاشىلىعى مامانى جۇمىلدىرىلعان. ولار سۋ باسقان ەلدى مەكەندەردە زەردەلەۋ مەن شىعىندى ەسەپتەۋ جۇمىستارىن جۇرگىزۋدە. سۋدا قالعان مالداردى قۇتقارۋشىلارمەن بىرگە قاۋىپسىز جەرگە كوشىرۋدە.

«جاڭا جول اۋىلدىق وكرۋگىندەگى جەتى ەلدى مەكەندە ەكى كۇننەن بەرى مالدىڭ 85 پايىزىن سۋدان شىعارىپ الدىق. ماسەلەن، ءىرى قارانىڭ - 80 پايىزعا جۋىعىن (1100)، جىلقى - 89 پايىز (132)، ۇساق مالدان - 72 پايىزىن (221) كوشىرىپ ۇلگەردىك. ولاردى كورشىلەس كەلەس اۋدانىنداعى جايىلىمدارعا اپاردىق. سۋ قويمانىڭ جانىنداعى جايىلىمدارعا جەتكىزگەنبىز. دەگەنمەن جىلقى مالى وزدەرىنىڭ تۇراقتى مەكەنىنە قايتىپ كەتىپ، ءبىراز قيىندىق تۋعىزۋدا. ال، سۋ باسقان ەلدىمەكەندەرگە قايىقپەن بارىپ، شىعىن كولەمىن ەسەپتەيمىز»، - دەدى تۇرعانبەك وسپانوۆ.

اۆتور: اينۇر اقبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى