اۋىل جولدارىنىڭ 85 پروتسەنتىن جاقسارتامىز - مينيستر

ءمينيستردىڭ ايتۋىنشا، بيىل «نۇرلى جولدىڭ» 23 جوباسى اياسىندا بارلىق ايماقتاردا رەسپۋبليكالىق ماڭىزى بار 4200 شاقىرىم جولدار جاڭادان توسەلەدى، ءيا بولماسا، كۇردەلى جوندەۋدەن وتەتىن بولادى.

«ءبىز ونداي جۇمىستىڭ كولەمىن العاش رەت الىپ وتىرمىز. وسىنىڭ ناتيجەسىندە 2020 - جىلدا رەسپۋبليكالىق ماڭىزى بار جولداردىڭ 90 پروتسەنتى «جاقسى» جانە «قاناعاتتانارلىق» جاعدايدا بولادى. ال I جانە II تەحنيكالىق ساناتتارعا جاتاتىن جولداردىڭ ۇلەسى 50 پروتسەنتكە دەيىن ارتاتىن بولادى»، - دەدى ج. قاسىمبەك بۇگىن وتاندىق كولىك- لوگيستيكا كەشەنىن دامىتۋ ماسەلەلەرىنە ارنالعان رەسپۋبليكالىق كەڭەستە.

بۇدان بولەك، وبلىستىق جانە اۋداندىق ماڭىزى بار جولداردى سالۋ ماسەلەسىنە باسا نازار اۋدارىلادى. قازىرگى كەزدە مينيسترلىك اكىمدىكتەرمەن بىرلەسە وتىرىپ، اتقارىلاتىن شارالاردىڭ جوسپارىن پىسىقتاپ جاتىر.

«جەرگىلىكتى جولداردى ورتاشا جوندەۋ جۇمىستارىنا نەگىزگى باسىمدىق بەرىلەدى. اتالعان شارالار كەزىندە رەسايكلينگ (وندايدا جولدىڭ ۇستىڭگى بەتىن قىرىپ الادى دا، اراسىنا بيتۋم جانە تاعى باسقا زاتتاردى قوسىپ، قايتادان توسەيدى - اۆت. ) جانە ءداستۇرلى تەحنولوگيالار قولدانىلادى. وسىعان وراي، جەرگىلىكتى جەردەگى جولداردى جوندەۋ جۇمىستارىن قارجىلاندىرۋ كولەمىن جىلىنا 150 ميلليارد تەڭگەگە دەيىن جەتكىزۋ كوزدەلىپ وتىر. سونىڭ ارقاسىندا شامامەن  5000 شاقىرىم جولدى جوندەپ وتىرۋعا مۇمكىندىك بار. ال 2025 - جىلعا دەيىن جەرگىلىكتى جولداردىڭ 85 پروتسەنتىن جاقسارتۋعا بولادى»، - دەپ اتاپ كورسەتتى ج. قاسىمبەك.

 ايتا كەتەيىك، بۇگىنگى كەڭەس كەزىندە ق ر پرەمەر- ءمينيسترىنىڭ ءبىرىنشى ورىنباسارى اسقار مامين كونتەينەرلىك ترانزيتتى وزگە ەلدەردە ۇيىمداستىرۋ ماسەلەسىنە باسا نازار اۋداردى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى