س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى 85 جىلدىعىن اتاپ ءوتىپ جاتىر

«بۇل مەرەيتوي كۇنى بۇگىنگە دەيىن اتقارىلعان جۇمىستار بويىنشا قورىتىندى جاساۋعا جانە بولاشاققا جوسپار قۇرۋعا مۇمكىندىك بەرەدى.

مەرەيتويعا باعىتتالعان شاراعا ەلىمىزدەگى بارلىق مەديتسينالىق جوعارى وقۋ ورىندارىنىڭ رەكتورلارى، شەتەلدىك ارىپتەستەر، ءبىزدىڭ تۇلەكتەرىمىز، سونداي-اق دۇنيەجۇزىلىك مەديتسينالىق ءبىلىم بەرۋ فەدەراتسياسىنىڭ پرەزيدەنتى دەۆيد گوردون كەلدى»، - دەدى قازۇمۋ رەكتورى، مەديتسينا عىلىمدارىنىڭ دوكتورى، پروفەسسور ايقان اقانوۆ.

ءوز كەزەگىندە ق ر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ەرجان ءبىرتانوۆ بۇگىندە س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ەلىمىزدە جەتەكشى مەديتسينالىق جوعارى وقۋ ورىندارىنىڭ ءبىرى ەكەندىگىن باسا ايتتى.

بۇل وقۋ ورنى الەمنىڭ 43 ەلىندە 100 دەن استام عىلىمي ورتالىقتار مەن وقۋ مەكەمەلەرىمەن تىعىز بايلانىس ورناتقان.

«مەملەكەتتىڭ ءال-اۋقاتى جاقسارىپ، قوعام جاڭارعان سايىن دەنساۋلىققا قاتىستى الەۋمەتتىك كۇتىم دە ارتا تۇسەدى. قازىرگى تاڭدا ەلىمىزدە 2016-2019-جىلدارعا ارنالعان جاڭا «دەنساۋلىق» مەملەكەتتىك باعدارلاماسى ازىرلەنگەن.

بۇل ماڭىزدى قۇجاتتىڭ ستراتەگيالىق باعىتتارىنىڭ ءبىرى -مەديتسينالىق ءبىلىم مەن عىلىمدى ودان ءارى جاڭعىرتۋ. بۇل ۋنيۆەرسيتەت، ءىرى جوعارى وقۋ ورىندارىنىڭ ءبىرى رەتىندە وسى باعدارلامانىڭ دامۋىنا ءوز ۇلەسىن قوسۋى ءتيىس. بۇل ءۇشىن ونىڭ ماتەريالدىق-تەحنيكالىق بازاسى، پروفەسسور-وقىتۋشىلىق قۇرامى، تاجىريبەسى، كەڭ كولەمدى حالىقارالىق سەرىكتەستىگى جەتكىلىكتى»، - دەدى ۆيتسە-مينيستر.

سونىمەن قاتار، ە. ءبىرتانوۆ دەنساۋلىق ساقتاۋ جۇيەسىن ءارى قاراي دامىتۋ بويىنشا بىرلەسە اتقارىلىپ جاتقان جۇمىستاردىڭ كادرلاردى دايارلاۋدىڭ جاڭا ستاندارتتارىن ەنگىزۋگە جانە مەديتسينالىق كومەك كورسەتۋ دەڭگەيىن اتتىرۋعا مۇمكىندىك بەرەتىندىگىن ايتتى.

ايتا كەتەلىك، قازاقستاندا العاشقى مەديتسينالىق ينستيتۋت الماتىدا 1930-جىلى 2- جەلتوقساندا قۇرىلعان. ونى العاشقى ديرەكتورى بولىپ يمپەراتورلىق اسكەري-مەديتسينالىق اكادەميانىڭ تۇلەگى سانجار اسفەندياروۆ تاعايىندالعان. العاشقى كەزدە ەمدەۋ فاكۋلتەتىنىڭ 10 كافەدراسى اشىلعان.

ال بۇگىندە اتالمىش جوعارى وقۋ ورنىندا 62 كلينيكالىق كافەدرا جۇمىس ىستەيدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى