الماتىدا بەلگىلى تۇركولوگ ءابجان قۇرىشجان ۇلىنىڭ 85 جىلدىعى اتالىپ ءوتتى
جيىندا پروفەسسور ءابجان قۇرىشجان ۇلىنىڭ تۇركى دۇنيەسىن، ءتىلى مەن تاريحىن، رۋحانياتىن زەرتتەۋگە قوسقان ۇلەسى تۋرالى ءسوز قوزعالدى.
كونفەرەنسياعا ەلىمىزبەن قاتار شەتەلدىك تۇركىتانۋشى عالىمدار، ءتىل ماماندارى، حالىقارالىق تۇركى اكادەمياسىنىڭ عالىم حاتشىسى، ف. ع. د. پروفەسسور امانتاي ءشارىپ، ەگە ۋنيۆەرسيتەتى تۇركى الەمى زەرتتەۋلەر ينستيتۋتىنىڭ پروفەسسورى فيكرەت تۇركمەن (يزمير)، ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى مىرزابەرگەن مالباقوۆ، يىلدىز تەحنيكالىق ۋنيۆەرسيتەتىنىڭ پروفەسسورى - مەحمەت ولمەز قاتىستى.
شارا بارىسىندا عالىمنىڭ جۇبايى شايزادا قۇرىشجانوۆا حالىقارالىق تۇركى اكادەمياسىنىڭ دەمەۋشىلىگىمەن جارىق كورگەن ءابجان قۇرىشجان ۇلىنىڭ «ءيۇسۇپ ۇلىق حاس حاجيب بالاساعۇني. قۇتادعۋ بىلىك» جانە «فورمى ي زناچەنيا پادەجەي ۆ يازىكە كودەكس كۋمانيكۋس» اتتى كىتاپتارىنىڭ تۇساۋىن كەستى.
«قازىرگى كەزدە ۋاقىت تالابىنا ساي مۇنداي حالىقارالىق ينتەگراتسيالار مەن بايلانىستاردى نىعايتۋ قىزمەت ەتەتىن الەمدىك اۋقىمداعى كاسىبي ماماندار قاجەت. مۇنداي ماماندار قازىر ۇلكەن سۇرانىسقا يە. سولاردىڭ ءبىرى - ءابجان قۇرىشجان ۇلى ەدى. بۇل ەسىم بەرىسى - قازاققا، ارىسى الەم تۇركىتانۋشىلارىنا تانىس ەسىم بولدى. زەرتتەۋشىلىك مول تۇيسىگى مەن قارىمدى قالامىنىڭ، ىزدەنىمپازدىعىنىڭ ارقاسىندا سوناۋ كونە تاريح تەرەڭىنە كەتكەن ورتا عاسىر ەسكەرتكىشتەرىن «كودەكس كۋمانيكۋستان» باستاپ ءبىرقاتار تۇركى جۇرتىنا ورتاق مۇرالاردى عىلىم تەزىنە سالىپ زەرتتەدى»، - دەدى قىزدار ۋنيۆەرسيتەتىنىڭ ءبىرىنشى پرورەكتورى باحودير اليەۆ وقۋ ورنىنىڭ رەكتورى دينار نوكەتايەۆانىڭ العى ءسوزىن جەتكىزە وتىرىپ.
كونفەرەنسيادا دارىندى عالىم، ۇلاعاتتى ۇستاز ءابجان قۇرىشجان ۇلى تۋرالى ارنايى باياندامالار جاسالىپ، ەستەلىكتەر ايتىلادى.
پلەنارلىق جيىننان سوڭ قاتىسۋشىلار وڭتۇستىك كورەيانىڭ حانكۋك ۋنيۆەرسيتەتىندەگى عالىمنىڭ قىزى ءاليا قۇرىشجانوۆامەن، ۇلى بريتانيانىڭ كەمبريدج ۋنيۆەرسيتەتىندەگى ەكىنشى قىزى جانار قۇرىشجانوۆامەن، تۇركيا رەسپۋبليكاسىنىڭ ەگە ۋنيۆەرسيتەتىمەن، ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتى جانە ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىمەن ونلاين رەجيمدە تىلدەستى.
تۇستەن كەيىن كونفەرەنسيا جۇمىسى سەكسيالىق جۇمىستارعا ۇلاسادى.
كونفەرەنسيا جۇمىسى «ءتۇبى ءبىر تۇركىمىز» اتتى ءداستۇرلى تۇركى حالىقتارىنىڭ فەستيۆالىمەن اياقتالادى.
