بوكەي ورداسىندا ءۇي قابىرعاسىندا 85 جىل بويى ساقتالعان گازەت تابىلدى
اتالمىش تاريحي-مۋزەي كەشەنىنىڭ عىلىمي قىزمەتكەرى گۇلمارۋ مىرزاعاليەۆانىڭ حابارلاعانىنداي، ءۇي قابىرعاسى اراسىنان گازەتتەرمەن قاتار كوزىلدىرىك پەن كىشكەنە اينەك قۇتى دا تابىلعان. 85 جىل بويى جاتقان گازەت شيىرشىقتالا ورالىپ، ورتاسىنان كەندىر جىپپەن بۋىلعان. گازەتتىڭ وسىنشاما جىل ىلعال تيمەي، كەمىرگىشتەر زيانداماي، بەتتەرى ۇگىتىلمەي ساقتالۋىنىڭ ءوزى تاڭعالارلىق.
اۋداندىق گازەتتىڭ 85 جىلدىعى قارساڭىندا تابىلىپ وتىرعان بۇل گازەت كەرەمەت سىيلىق بولدى.
1930-1952-جىلدار اراسىندا وردا اۋداندىق اتقارۋ كوميتەتى ورگانى بولدى دەلىنىپ جۇرگەن «جاڭا جول» اپتاسىنا ەكى رەت شىعاتىن وردا، جانىبەك، جاڭاقالا، تالوكپە، جالپاقتال جانە شەجىن اۋداندىق پارتيا كوميتەتتەرى مەن اۋداندىق اتقارۋ كوميتەتتەرىنىڭ جانە كاسىپشىلەر وداعىنىڭ گازەتى بولعان ەكەن. گازەتتىڭ مەكەنجايى: «پ. ۋردا، رەد. گاز. «جاڭا جول» 1930-جىل 8- وكتيابر سارسەنبى 9№» دەلىنگەن. ءبىرىنشى، ءتورتىنشى بەتتەرى لاتىن ارپىندە، ەكىنشى-ءۇشىنشى بەتتەرى اراب ارپىمەن باسىلعان. فورماتى ا3 كولەمىندە.
«كولحوزدار جۇمىسىن كۇشەيتۋگە بار جىگەر جۇمسالسىن»، «ەگىس جانە كوللەكتيۆ كۇنىنە ازىرلەنىڭىز»، «تالوكپە قابىل الدى»، «شەجىن اۋدانى جاۋابىڭ قاشان؟»، «كەڭەستەر سايلاۋى قاشان بولادى؟»، «تاجىكستاندا جەر قوزعالىسى بولعان»، «اۋرۋحانا ءۇيى بوس تۇر» (جانىبەك، اقوبا) سياقتى ماقالالار بار. سونداي-اق وردا اۋداندىق سوعىس بولىمىنەن تاسقىن ۇلىنىڭ 1907-08-جىلعى ەر-ازاماتتاردىڭ اسكەري مەدكوميسسيادان جانىبەك قالاسىنان ءوتۋ تۋرالى قۇلاقتاندىرۋى (اراب ارپىمەن)، وردا اۋداندىق بانك باستىعى كاكىم ۇلىنىڭ قۇلاقتاندىرۋى باسىلعان. دەنساۋلىق ءبولىمىندە «تەڭگە قوتىر، جىڭىشكە اۋرۋلارى تۋرالى» دارىگەر پ. پەچەرنيكوۆانىڭ ماقالاسى بەرىلگەن.
تيراجى 5000 دەپ كورسەتىلگەن سارعايعان گازەت بەتتەرىندەگى جاريالىم اۆتورلارى ءالمۇقاش ۇلى، سۇيەگەن ۇلى، كەڭەس اعاسى - يگىباي ۇلى، سارى بالا، وردا اۋاتكوم اعاسى ساتىعۇل ۇلى، حاتشى مەرتەن ۇلى دەلىنسە، ەندى بىرەۋلەرى باسقارما، گازەتشى، كورگەن دەپ ناقتى اتى-جوندەرىن كورسەتپەي جازادى. «جاڭا جولدىڭ» وسى سانىنان رەسپۋبليكاعا تانىمال جۋرناليست بولعان ماعزوم مەرتەنوۆ، گازەت ارداگەرى عاتاۋ ماحامبەتوۆتىڭ ەسىمدەرى تانىلادى. گازەتتىڭ وسىناۋ سانىنىڭ 5 بىردەي داناسى نەگە قابىرعاعا جاسىرىلعانى بەلگىسىز.
ايتا كەتەيىك، بىرەر جىل بۇرىن قازاقستانداعى العاشقى باسپاحانا عيماراتى بولىپ ەسەپتەلەتىن ءۇي كەيىنگى جىلدارى قايتا تۇرعىزىلىپ، ول بوكەي ورداسىنداعى باسپا ءسوز مۋزەيى رەتىندە اشىلعان بولاتىن. جاڭادان تابىلعان گازەتتەر قۇندى جادىگەرلەر قاتارىنان ورىن الارى انىق.
اۆتور: ەلجان ەرالى
