الەمدەگى ەڭ العاشقى ءزاۋلىم عيماراتتىڭ سالىنعانىنا 85 جىل تولدى
اسپانمەن تالاسقان نىسان ءالى كۇنگە دەيىن ءوز ساۋلەتىمەن حالىقتى تاڭداي قاقتىرىپ كەلەدى. اتاۋلى كۇن قارساڭىندا تىلشىلەرىمىز Empire State Building تىڭ 102-قاباتىنا كوتەرىلىپ، عيمارات ديرەكتورىمەن سۇحباتتاسىپ قايتتى. بيىكتىگى 443 مەترلىك عيماراتتىڭ جوعارعى قاباتىنان بۇكىل نيۋ-يورك قالاسىنىڭ كەلبەتىن كورۋگە بولادى. نىسان 1931 - جىلى نەبارى 410 كۇن ىشىندە سالىنىپ بىتكەن.
وسى ۋاقىتقا دەيىن امەريكانىڭ باس نىشانىندا ءورت تە، وزگە دە قايعىلى وقيعالار بولعان ەكەن. 1945 - جىلى كەشەننىڭ سوڭعى قاباتتارىنا بومبالاۋشى ۇشاق سوعىلسا، ادامدار دا اتاقتى عيماراتتىڭ توبەسەنىن قۇلاپ، ومىرلەرىن قيعان كەزدەر جوق ەمەس.
Empire State Building وبسەرۆاتورياسىنىڭ ديرەكتورى جان-يۆ گازي نىساننىڭ قۇرىلىسى رەكوردتى كەزەڭدە جۇرگىزىلگەنىن ايتادى. Empire State Building-تە گولليۆۋد ارتىستەرىنىڭ قاتىسۋىمەن كوپتەگەن فيلمدەر تۇسىرىلگەن.
بۇكىل الەمگە تانىمال «كينگ كونگ» كينوسىنىڭ ءۇزىندىسى دە سولاردىڭ قاتارىندا.
جان- يۆ گازي، Empire State Building وبسەرۆاتورياسىنىڭ ديرەكتورى:
- بىزگە توم كرۋز، سەلين ديون، مەرايا كەرري، پەنەلوپا كرۋز، رياننا سىندى بەلگىلى ادامدار كەلىپ تۇرادى. بىرەۋلەر كەلەتىنى جايلى الدىنا الا حابارلاسا، سەلين ديون بالاسىن الىپ كەنەتتەن كەلدى. ءبىز ولارعا بولەك ەكسكۋرسيا وتكىزدىك.
ال كەشەن توبەسىنىڭ ءتۇسى ەلدە بولاتىن ماڭىزدى وقيعالارعا بايلانىستى كۇندە وزگەرىپ تۇرادى. ونداعى قىزمەتكەرلەردىڭ كيىمى ارت- دەكو ستيلىندە تىگىلگەن. جانە عيماراتتاعى 6514 تەرەزەنى اۋىستىرماي-اق، ونى جەتىلدىرۋ ارقىلى جارىق وتكىزۋ مەن جىلۋ ساقتاۋ مۇمكىندىگى ارتتىرىلدى.
جان- يۆ گازي، Empire State Building وبسەرۆاتورياسىنىڭ ديرەكتورى:
- بۇگىنگى تاڭدا بۇل كەشەندى ەنەرگوتيىمدىلىك ۇلگىسى دەپ اتاۋعا تولىق نەگىز بار. ورتاشا ەسەپپەن بارلىق عيماراتتار ەلەكتر ەنەرگياسىنىڭ 80 پايىزىن قولدانسا، ءبىز ونىڭ 40 پايىزىن ۇنەمدەيمىز.
جىل سايىن اقپان ايىندا اتى اڭىزعا اينالعان عيمارات الدىندا جۇگىرۋدەن جارىس ۇيىمداستىرىلادى. قاتىسۋشىلار 10 مينۋت ىشىندە باسپالداقپەن جوعارى جۇگىرىپ شىعۋى ءتيىس.
24.kz
