الماتىدا 84 مىڭنان استام اعاش ءشىرىپ تۇر
بۇل تۋرالى قالالىق ەكولوگيا جانە قورشاعان ورتا باسقارماسى جاسىل قوردى باسقارۋ جانە مونيتورينگ ءبولىمىنىڭ باسشىسى نۇرلان قۇتتىبايەۆ باسپا ءسوز تۋرىندا ايتتى، دەپ حابارلايدى قازاقپارات ءتىلشىسى.
ايتۋىنشا، وتكەن جىلى قالادا قۇلاۋ قاۋپى بار اعاشتاردى كەسۋدىڭ بەس جىلدىق جوسپارى بەكىتىلگەن. سوعان سايكەس، بىلتىر ماگيسترالدىق جولدار بويىندا، ساياباق ايماقتارىندا جانە اۋلاىشىلىك اۋماقتاردا 6 مىڭ شىرىگەن اعاش كەسىلىپ، ونىڭ ورنىنا 68 مىڭ كوشەت وتىرعىزىلدى.
«بيىل باسقارما 16925 مىڭ قاۋىپتى اعاشتى كەسۋدى جوسپارلاپ وتىر جانە كەسىلگەن اعاشتاردىڭ ورنىنا 169250 مىڭ كوشەت وتىرعىزۋ كوزدەلگەن»، - دەدى ول.
بۇگىنگى كۇنى كەستەگە سايكەس جالپى پايدالانىمداعى جەرلەردە ءوسىپ تۇرعان قاۋىپتى اعاشتاردى كەسۋ جۇمىستارى باستالدى. وعان 33 بريگادا تارتىلدى، بارلىعى 180-نەن استام ادام جۇمىس ىستەيدى. جۇمىس باستالماس بۇرىن جاقىن ماڭداعى ۇيلەردىڭ تۇرعىندارى قۇلاعدار ەتىلگەن. ەسكەرتۋ بەلگىلەرى ورناتىلىپ، قاجەتتى قاۋىپسىزدىك شاراسى ساقتالادى.
ج. جيەمبايەۆ اتىنداعى قازاق وسىمدىك قورعاۋ جانە كارانتين عزي قىزمەتكەرلەرى، بوتانيكا جانە فيتوينترودۋكسيا ينستيتۋتى جانە ەكوبەلسەندىلەر قاۋىپتى اعاشتى مۇقيات تەكسەرەدى.
«اعاشتىڭ ساۋ نەمەسە شىرىگەن ەكەنىن كوزبەن كورىپ انىقتاۋ اركەز مۇمكىن ەمەس. سوندىقتان، اعاشتىڭ وزەگىندە نەمەسە تامىرىندا شىرىكتىڭ بولۋىن انىقتاۋعا مۇمكىندىك بەرەتىن ارنايى قۇرىلعى- بۇرعى بار. قالالارداعى جاسىل كەڭىستىكتىڭ جاسى تابيعاتقا قاراعاندا تومەن. ويتكەنى، قالادا اعاشتار اۋىر مەتالداردى سىڭىرەدى جانە ءارتۇرلى مەحانيكالىق زاقىمعا ۇشىرايدى. قاتتى جەل سوققان كەزدە اۋرۋ اعاشتار قۇلاپ، عيماراتتارعا، قۇرىلىستارعا زيان كەلتىرىپ، سونىمەن قاتار ادام شىعىنىنا اكەلۋى مۇمكىن»، - دەيدى ج. جيەمبايەۆ اتىنداعى قازاق وسىمدىك قورعاۋ جانە كارانتين ع ز ي بيولوگيالىق قورعاۋ ءبولىمىنىڭ مەڭگەرۋشىسى نۇرجان مۇحاماديەۆ.
