قاراعاندىلىق 84 جاستاعى اقساقال تراكتورمەن اۋىل جولدارىن قاردان تازارتۋدا - فوتو
ميننياگزام اۆلياروۆ باشقۇرتستاندا دۇنيەگە كەلگەن جانە جاس كەزىندە قازاقستانعا تىڭ جەرلەردى يگەرۋگە كەلگەن. تىكەنەكتى اۋىلىندا تۇرىپ، ۇزاق جىلدار مەحانيزاتور بولىپ جۇمىس ىستەگەن. كومباين، تراكتور جانە باسقا دا ارنايى تەحنيكانى تىزگىندەپ، ەلگە قىزمەت كورسەتكەن. مۇندا ول ۇيلەنىپ، جۇبايىمەن بىرگە بەس بالا - ءۇش قىز بەن ەكى ۇل تاربيەلەپ ءوسىردى. اۋىل تۇرعىندارى اقساقالدى اعزام اعا دەپ اتاپ كەتكەن. زەينەتكەر ءومىر بويى قىس تۇسكەندە اۋىلدىڭ قارىن كۇرەپ، كوكتەمدە بوگەتتەردى نىعايتۋمەن اينالىسىپ كەلەدى.
زەينەتكە شىققاننان كەيىن دە اعزام اعا قول قۋسىرىپ وتىرا الماعان. حالىق اراسىندا بەلسەندى ازاماتتىق ۇستانىمى ءۇشىن وعان «كۇمىس ۆولونتەر» جانە «سۋپەرمەن» دەگەن لاقاپ ات بەرىلگەن.
«قازاقستانعا 1958 -جىلى، 19 جاسىمدا تىڭ جەرلەردى يگەرۋگە كەلدىم. 1961 -جىلى مەنى وسىندا جىبەردى. ول كەزدە مىنا جەرلەر قۋ دالا بولاتىن، مەن سوۆحوز قۇرىلىسىنا قاتىستىم. سودان بەرى وسىندا تۇرامىن. تىكەنەكتى - بۇل مەنىڭ وتانىم. اۋىلداستارىما شىن جۇرەكتەن كومەكتەسەمىن. اللا تاعالا ماعان كۇش- قۋات بەرگەندىكتەن، ادامدارعا كومەكتەسۋىم كەرەك دەپ سانايمىن. سونىمەن قاتار قازىر ءبىزدىڭ اۋىلدا كوبىنە قارتتار عانا قالدى. اۋىلىمىزدى قار باسىپ كەتكەندە، ولارعا ءجۇرىپ- تۇرۋ قيىنعا سوعادى»، - دەيدى اقساقال.
اۋىل اكىمى ەرلان وسپانوۆ اعزام اتا وسىنداي ازاماتتىق ۇستانىمىمەن جاستارعا ۇلگى كورسەتىپ وتىر دەپ سانايدى.
«اعزام اعانى ءبارىمىز قۇرمەتتەيمىز. ول كىسى جەرگىلىكتى حالىققا قىرىق جىل بويى كومەكتەسىپ كەلەدى. ونىڭ شاعىن شارۋا قوجالىعى بار. قىستا قار كۇرەيدى، جازدا جەرگىلىكتى تۇرعىندارعا ءشوپ جيناۋعا كومەكتەسەدى. بيىل قونىس اۋدارۋ باعدارلاماسى بويىنشا پاۆلودار وبلىسىنان وسىندا كوشىرىپ اكەلەمىز دەپ وتىرعان وتباسىعا كومەك كورسەتۋگە دايىن. ول كوپبالالى وتباسى، ولارعا شارۋا قوجالىقتارىنىڭ باسقا باسشىلارى دا كومەك كورسەتەدى. ال اقساقالعا زور دەنساۋلىق تىلەيمىز. ءدال وسىنداي ادامدار ءبىزدىڭ جاستارىمىزعا ۇلگى بولۋى كەرەك»، - دەيدى ەرلان وسپانوۆ.
تىكەنەكتى اۋىلىندا بۇگىنگى تاڭدا 226 ادام تۇرادى. ەلدى مەكەن اۋدان ورتالىعىنان 320 شاقىرىم جانە قاراعاندىدان 550 شاقىرىم جەردە ورنالاسقان.
