قازاقستاننىڭ ۇشۋ قاۋىپسىزدىگى ستاندارتتارىنا سايكەستىك دەڭگەيى 82 پايىزدى قۇرايدى
«قازىرگى ۋاقىتتا قازاقستاننىڭ ۇشۋ قاۋىپسىزدىگى ستاندارتتارىنا سايكەستىك دەڭگەيى 82 پايىزدى قۇرايدى. بۇل - تاۋەلسىز مەملەكەتتەر دوستاستىعى ەلدەرى اراسىنداعى ەڭ جوعارى كورسەتكىشتەردىڭ ءبىرى. قازاقستان دانيا مەن پولشا سياقتى ەۋروپالىق وداق ەلدەرىمەن ءبىر دەڭگەيدە تۇر. قاۋىپسىزدىك دەڭگەيىنىڭ ۇزدىكسىز ءوسۋىن قامتاماسىز ەتۋ ماقساتىندا 2019 -جىلى ەۋروپالىق مودەل نەگىزىندە ازاماتتىق اۆياتسيا جۇيەسى تۇبەگەيلى رەفورمالاندى. قازاقستاننىڭ اۆياتسيالىق اكىمشىلىگى قۇرىلدى. وعان زاڭنامالىق دەڭگەيدە ازاماتتىق اۆياتسيا سالاسىنداعى باقىلاۋ- قاداعالاۋ فۋنكتسيالارى بەرىلدى. وسى ۇيىم قۇرىلعان ساتتەن باستاپ 934 تەكسەرۋ جانە سەرتيفيكاتتاۋ جۇرگىزىلىپ، ۇشۋدى ورىنداۋ ءۇشىن 1500-گە جۋىق رۇقسات ەتۋ قۇجاتتارى بەرىلدى»، - دەدى مارات قارابايەۆ.
ونىڭ اتاپ وتۋىنشە، سەرتيفيكاتتىق تالاپتارعا سايكەس كەلمەيتىن، سونداي- اق ۇشۋ قاۋىپسىزدىگىنە قاتەر توندىرگەن 7 اۋە كومپانياسىنىڭ پايدالانۋشى سەرتيفيكاتتارىنىڭ كۇشى جويىلدى نەمەسە كەرى قايتارىلدى. سونداي- اق 7 اۋەجايدىڭ ۇشۋ- قونۋ جولاعىن پايدالانۋ ۋاقىتشا توقتاتىلدى.
«بۇگىنگى كۇنى ازاماتتىق اۆياتسيانىڭ مەملەكەتتىك تىزىلىمىندە 915 اۋە كەمەسى بار. ءوز قىزمەتىن 55 قازاقستاندىق پايدالانۋشى جۇزەگە اسىرۋدا. تۇراقتى جولاۋشىلار تاسىمالىنا 5 اۋە كومپانياسىنىڭ 90 ۇشاعى تارتىلعان. جاڭا مودەل ەنگىزىلگەن ساتتەن باستاپ وقيعالار سانىنىڭ تومەندەۋى بايقالادى»، - دەدى مينيستر.
قازاقستان اۋە ترانزيتتەرى ءۇشىن نەعۇرلىم تارتىمدى بولا تۇسۋدە.
«بۇگىنگى كۇنى ازاماتتىق اۆياتسيا سالاسىنىڭ نەگىزگى كورسەتكىشتەرى تۇراقتى ءوسۋدى كورسەتىپ كەلەدى. 2022 -جىلدىڭ قورىتىندىسى بويىنشا وتاندىق اۆياكومپانيالار 11 ميلليون جولاۋشىنى تاسىمالدادى. بۇل 2021 -جىلمەن سالىستىرعاندا 17 پايىزعا ارتىق. ءوسۋ قارقىنى بيىل دا ساقتالىپ وتىر. اۋە ترانزيتى دە جوعارى قارقىنمەن وسۋدە. اعىمداعى جاعدايدا قازاقستان اۋە ترانزيتتەرى ءۇشىن نەعۇرلىم تارتىمدى بولا تۇسۋدە. ماسەلەن، 2022 -جىلى قىزمەت كورسەتىلگەن ۇشۋ كولەمى 410 مىڭ ۇشاقتى قۇرادى. بۇل 2021 -جىلعى كورسەتكىشتەن 90 پايىزعا كوپ»، - دەدى مينيستر.
ونىڭ اتاپ وتۋىنشە، قازاقستان رەسپۋبليكاسىنىڭ كولىك- لوگيستيكالىق الەۋەتىن دامىتۋدىڭ 2030 -جىلعا دەيىنگى تۇجىرىمداماسىنا سايكەس، سالانىڭ نەگىزگى ستراتەگيالىق مىندەتى - ۇشۋ قاۋىپسىزدىگىن قامتاماسىز ەتۋ جانە ەلىمىزدىڭ ترانزيتتىك الەۋەتىن دامىتۋعا قولايلى جاعدايلار جاساۋ.
«ازاماتتىق اۆياتسيا سالاسىن دامىتۋ ءۇش باعىتتا جۇرگىزىلۋدە. ءبىرىنشى - ۇشۋ قاۋىپسىزدىگىن قامتاماسىز ەتۋ. ەكىنشى - مارشرۋتتىق جەلىنى دامىتۋ. ءۇشىنشى - ينفراقۇرىلىمدى دامىتۋ»، - دەدى مارات قارابايەۆ.
