شىعىس قازاقستاندا قاۋىپتى نىسان رەتىندە 82 ساۋدا جانە ويىن-ساۋىق كەشەنى ەسەپكە الىندى
رەسەيدەگى قايعىلى جاعدايدان كەيىن شىعىس قازاقستانداعى ساۋدا جانە ويىن-ساۋىق ورىندارى ءورت قاۋىپسىزدىگىنە تەكسەرىلە باستادى. تەكسەرۋگە جاتاتىن كەشەندەردىڭ جالپى اۋدانى 1500 شارشى مەتردى قۇرايدى. ال جىل سايىنعى جوسپارلى تەكسەرۋدە كەمشىلىك تابىلماعان نىساندار بۇل تىزىمگە كىرمەگەن.
«قازىرگى تاڭدا وبلىس بويىنشا 82 ساۋدا نىسانى ەسەپكە الىنىپ، جوعارى دارەجەدەگى تاۋەكەل نىساندارىنا جاتقىزىلدى. ءورت قىزمەتىنىڭ ماماندارى ولاردىڭ سانى بۇدان دا كوپ بولۋى مۇمكىن ەكەنىن ايتادى. ويتكەنى كاسىپكەرلەر ءبىر نىساننىڭ ءوزىن قاعاز جۇزىندە بولشەكتەپ، بىرنەشە ادامنىڭ اتىنا جازعىزىپ تاستاعان. وسىنىڭ كەسىرىنەن ساۋدا نىسانى بولىپ تىركەلگەن عيماراتتىڭ اۋدانى قۇجاتتا كىشىرەيتىلىپ كورسەتىلەدى. نىساننىڭ قالعان بولىگى باسقانىڭ مەنشىگىندە بولعاندىقتان، ونى ءورت قاۋىپسىزدىگىنە جاۋاپتى ورىندار تەكسەرە المايدى»، - دەيدى توتەنشە جاعداي دەپارتامەنتىنىڭ باسپا ءسوز حاتشىسى اناستاسيا سكليار.
ال كەيبىر كاسىپكەرلەر ءۇشىن ءورت قاۋىپسىزدىگىنىڭ تالاپتارىن ساقتاعاننان ايىپپۇل تولەپ قۇتىلۋ ءتيىمدى. ماسەلەن، بىلتىر سەمەي قالاسىنداعى «ارعىماق» ساۋدا ۇيىندە ءورت قاۋىپسىزدىگىنە قايشى كوپتەگەن جاعدايلار انىقتالعان. ساۋدا ورتالىعىنىڭ مەنشىك يەسى بولىپ سانالاتىن «تاكسوموتورنىي پارك» ج ش س كەمشىلىكتەردى كورسەتىلگەن مەرزىمدە جويماعان. ءسويتىپ ءىس سوتقا دەيىن جەتەدى. سوت ساۋدا سەرىكتەستىككە ايىپپۇل سالۋمەن شەكتەلگەن.
«سوت ورىندارى مۇنداي نىسانداردىڭ جۇمىسىن توقتاتۋعا قۇقىلى. ءبىراق كوپ جاعدايدا ولار ايىپپۇل تاعايىنداۋمەن شەكتەلەدى. كەيدە عانا نىساننىڭ جۇمىسىن 3-15 كۇنگە شەكتەيدى» - دەيدى اناستاسيا سكليار.
2017 -جىلدان بەرى وبلىس اۋماعىندا 50-دەن استام ساۋدا جانە ويىن-ساۋىق نىسانى ءورت قاۋىپسىزدىگىنە تەكسەرۋدەن ءوتىپ، 280 زاڭبۇزۋشىلىق انىقتالعان ەكەن. ولقىلىق جىبەرگەن نىسان يەلەرىنە جالپى جيىنى 680 مىڭ تەڭگە ايىپپۇل سالىنعان.
