داۋىس بەرۋ 8150 سايلاۋ ۋچاسكەسىندە ءجۇرىپ جاتىر

بۇل تۋرالى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.

«ق ر ورتالىق سايلاۋ كوميسسياسى وبلىستاردىڭ، استانا، الماتى، شىمكەنت قالالارىنىڭ كوميسسيالارى ۇسىنعان دەرەكتەرگە سايكەس، استانا ۋاقىتىمەن ساعات 07:00-دەگى جاعداي بويىنشا وڭىرلەردە 8150 ۋچاسكە داۋىس بەرۋگە كىرىسكەنىن حابارلايدى. سونىمەن قاتار 11 شەت مەملەكەتتەگى قازاقستاننىڭ 12 ۋچاسكەسىندە داۋىس بەرۋ باستالدى. كونستيتۋتسيالىق زاڭ اياسىندا اۋماقتىق كوميسسيالار قابىلداعان شەشىمگە سايكەس 86 ۋچاسكەدە داۋىس بەرۋ ساعات 06:00 دە باستالعان بولاتىن»، - دەدى كونستانتين پەتروۆ.

ونىڭ اتاپ وتۋىنشە، 5 وڭىردەگى، اتاپ ايتقاندا اقتوبە، اتىراۋ، باتىس قازاقستان، ماڭعىستاۋ جانە قىزىلوردا وبلىستارىنداعى 1883 سايلاۋ ۋچاسكەسىندە داۋىس بەرۋ جەرگىلىكتى ۋاقىتپەن ساعات 07:00 دە، ال استانا ۋاقىتىمەن ساعات 08:00 دە باستالادى.

«سونىمەن قاتار قازاقستان رەسپۋبليكاسىندا 10101، ونىڭ ىشىندە 53 شەت مەملەكەتتەگى 68 سايلاۋ ۋچاسكەسى بار ەكەندىگىن اتاپ وتەمىن. ولاردا داۋىس بەرۋ جەرگىلىكتى ۋاقىت بويىنشا ساعات 07:00-دە باستالادى. سايلاۋعا قاتىسۋعا قۇقىعى بار ازاماتتاردىڭ تىزىمىندە 11950485 سايلاۋشى بار. بۇعان قوسا كەشە 18:00-دە داۋىس بەرۋگە ارنالعان ەسەپتەن شىعارۋ كۋالىگىن بەرۋ اياقتالدى. رەسپۋبليكا بويىنشا 22578 كۋالىك بەرىلدى. سايلاۋشى ونىمەن ەلىمىزدىڭ كەز كەلگەن جەرىندەگى سايلاۋ ۋچاسكەسىندە داۋىس بەرە الادى»، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى