قىتاي مەن ەۋروپا اراسىنداعى قۇرلىقتىق جۇك تاسىمالىنىڭ 80 پايىزى قازاقستان ارقىلى وتەدى
«كولىك جانە لوگيستيكا سالالارىندا مۇمكىندىك مول. قازاقستان ەۋرازيانىڭ جۇرەگىندە ورنالاسقان. مۇنىڭ ستراتەگيالىق ءمانى زور. قىتاي مەن ەۋروپا اراسىنداعى بارلىق قۇرلىقتىق جۇك تاسىمالىنىڭ 80 پايىزى ءبىزدىڭ ەلىمىزدىڭ اۋماعى ارقىلى وتەدى. قازىرگى جاڭا گەوساياسي جاعدايدا «ورتا ءدالىزدىڭ» ماڭىزى ارتا ءتۇستى. بۇل - ورتالىق جانە شىعىس ازيادان ەۋروپاعا جۇك تاسىمالداۋدىڭ ەڭ قىسقا ءارى تۇراقتى باعىتى. 2022-جىلدان باستاپ كاسپيي ءدالىزى ارقىلى ەۋروپالىق وداققا مۇشە ەلدەرگە تاسىمالداناتىن جۇك كولەمى ەكى ەسە ارتتى. شىعىس پەن باتىس اراسىنداعى ۇلعايىپ كەلە جاتقان ساۋدا كولەمىنە قولداۋ كورسەتۋ ءۇشىن ءبىز ينفراقۇرىلىمدى جاڭارتۋ جانە كەدەرگىلەردى جويۋ جۇمىستارىن جۇرگىزىپ جاتىرمىز. ءبىز قازاقستاندىق پورتتاردىڭ وتكىزۋ مۇمكىندىگىن 30 ميلليون تونناعا دەيىن ارتتىرۋدى كوزدەپ وتىرمىز. ءبىز ەۋرووداقتىڭ «جاھاندىق قاقپا» باستاماسى مەن ءبىزدىڭ ۇلتتىق دەڭگەيدەگى كۇش- جىگەرىمىزدىڭ سينەرگياسىنا سەنەمىز. ءبىزدىڭ رەسۋرسىمىزدان بولەك، ناقتى جوبالار ەقدب، ەيب جانە KfW نەمىس دامۋ بانكى ارقىلى دا قارجىلاندىرىلۋى مۇمكىن. ەرتەڭ شتاينمايەر مىرزا كاسپي تەڭىزىنىڭ جاعاسىنداعى ماڭعىستاۋ وبلىسىنا بارىپ، وسى ترانسكاسپي حالىقارالىق كولىك باعىتىنىڭ زور الەۋەتىن ءوز كوزىمەن كورەدى»، - دەدى پرەزيدەنت.
قاسىم-جومارت توقايەۆ SVEVIND Group كومپانياسىمەن قۇنى 50 ميلليارد دوللار بولاتىن جاسىل سۋتەگىن ءوندىرۋ جونىندە كەلىسىمگە قول قويىلعانىن جەتكىزدى.
«قازىر بۇل - الەمدەگى ەڭ ءىرى جوبالاردىڭ ءبىرى. قازاقستاننىڭ وسى سالانى دامىتۋ الەۋەتى الدەقايدا زور. جاسىل سۋتەگى ءوندىرىسى ەكولوگيالىق تازا بولات، اليۋميني جانە باسقا دا مەتالدار وندىرىسىنە جول اشادى. گەرمانيانىڭ جوعارى تەحنولوگيالىق شەشىمدەرىمەن جانە قازاقستاننىڭ رەسۋرستارىمەن ءبىز، شىن مانىندە، الدىمىزعا بيىك ماقساتتار قويا الامىز»، - دەيدى ول.
قازاقستان پرەزيدەنتىنىڭ ايتۋىنشا، گەرمانيا - الەمدەگى جەتەكشى يننوۆاتسيالىق ورتالىقتاردىڭ ءبىرى.
بۇل ەل تەحنولوگيا مەن عىلىم سالاسىندا وتە جوعارى ستاندارتتاردى ەنگىزۋىمەن تانىمال.
«ءبىز ەۋرازياداعى وڭىرلىك يننوۆاتسيالىق جانە تسيفرلىق ورتالىق بولۋعا ۇمتىلامىز. اتالعان سالالاردىڭ بەرىك ىرگەتاسىن قالاۋدى باستادىق. قازاقستان سيفرلىق قىزمەت كورسەتۋ سالاسىندا وڭىرلىك كوشباسشى رەتىندە جوعارى باعالانادى. وسى ماقساتتا ءبىز ءتۇرلى باعىتتارعا، سونىڭ ىشىندە تەحنولوگيالىق جانە سيفرلىق زەرتتەۋلەرگە جانە ستارتاپتارعا گەرمانيالىق سەرىكتەستەرىمىزدى شاقىرعىمىز كەلەدى»، - دەپ اتاپ ءوتتى قاسىم- جومارت توقايەۆ.
